కాంస్యం కోసం మిక్స్‌డ్‌ జోడీ పోరు

గ్వాంగ్జూ: దక్షిణ కొరియాలో జరుగుతున్న ప్రపంచకప్‌ స్టేజ్‌-2 ఆర్చరీ టోర్నమెంట్లో భారత కాంపౌండ్‌ మిక్స్‌డ్‌ టీమ్‌ కాంస్యం కోసం పోరాడనుంది. శుక్రవారం జరిగిన సెమీఫైనల్లో అభిషేక్‌వర్మ, అవ్‌నీత్‌ కౌర్‌లతో కూడిన భారత్‌ జట్టు 156-158తో ఇస్తోనియా చేతిలో ఓడింది. అంతకుముందు అభిషేక్‌ ద్వయం 157-155తో డెన్మార్క్‌ను ఆ తర్వాత 156-153తో మెక్సికోను ఓడించింది. కాంస్య పతక పోరులో టర్కీతో భారత్‌ తలపడనుంది. రికర్వ్‌లో మన ఆర్చర్లు విఫలమయ్యారు. మిక్స్‌డ్‌ టీమ్‌ ప్రిక్వార్టర్స్‌లో 5-3తో జపాన్‌ జంటపై గెలిచిన తరుణ్‌దీప్‌ రాయ్‌-రిధి జోడీ.. క్వార్టర్స్‌లో 1-5తో జర్మనీ చేతిలో ఓటమి చవిచూసింది. పురుషుల సింగిల్స్‌లో తరుణ్‌దీప్‌ రాయ్‌ 2-6తో కిమ్‌ వుజిన్‌ (కొరియా) చేతిలో పరాజయం పాలవగా.. జయంత్‌ తాలుక్‌దార్‌ 5-6తో కిమ్‌ వుజిన్‌ చేతిలోనే పోరాడి ఓడాడు. తొలి రెండు సెట్లలో ఆధిక్యంలో నిలిచి ఆ తర్వాత తడబడిన తాలుక్‌దార్‌.. షూటాఫ్‌లో ఓడిపోయాడు. మహిళల రికర్వ్‌ సింగిల్స్‌లో కోమలిక బారి, రిధి కూడా ఓడిపోయారు. కోమలిక 4-6తో యాస్మిన్‌ (టర్కీ) చేతిలో ఓడగా.. రిధి 5-6తో లీ గయున్‌ (కొరియా)పై షూటాఫ్‌లో ఓడింది.