డెఫ్‌లింపిక్స్‌ అథ్లెట్లకు ప్రధాని ఆతిథ్యం

దిల్లీ: బ్రెజిల్‌లో డెఫ్‌లింపిక్స్‌ను ముగించుకుని భారత్‌కు చేరుకున్న భారత అథ్లెట్లకు ప్రధాని నరేంద్ర మోదీ శనివారం తన అధికారిక నివాసంలో ఆతిథ్యమిచ్చారు. ఈ క్రీడల్లో మన అథ్లెట్లు 16 పతకాలతో దేశాన్ని టాప్‌-10లో నిలిపారు. డెఫ్‌లింపిక్స్‌ చరిత్రలో భారత్‌కిదే అత్యుత్తమ ప్రదర్శన. ఈ నేపథ్యంలో ప్రధాని భారత అథ్లెట్లను తన నివాసానికి పిలిపించుకుని అభినందించారు. ‘‘డెఫ్‌లింపిక్స్‌లో చక్కటి ప్రదర్శనతో దేశం గర్వించేలా చేసిన మన ఛాంపియన్లతో జరిపిన సంభాషణను నేనెప్పటికీ మరిచిపోలేను. అథ్లెట్లు వారి అనుభవాలను నాతో పంచుకున్నారు. ఈ సందర్భంగా వారి పట్టుదల, క్రీడల పట్ల వారి ఉత్సాహం ఎలాంటిదో తెలిసింది. వారికి నా అభినందనలు’’ అని ట్విటర్లో మోదీ పేర్కొన్నారు.