వద్దనుకునే వదిలేశాం

ముంబయి: ముంబయితో మ్యాచ్‌లో టిమ్‌ డేవిడ్‌ బ్యాట్‌ అంచుకు బంతి తాకలేదని సమీపంలో ఫీల్డింగ్‌ చేస్తున్నవాళ్లు చెప్పడంతోనే సమీక్షకు వెళ్లకుండా ఆగిపోయానని చెప్పాడు దిల్లీ కెప్టెన్‌ రిషబ్‌ పంత్‌. ‘‘మొదట బంతి డేవిడ్‌ బ్యాట్‌ అంచుకు తాకినట్లు అనిపించింది. సమీక్షకు వెళ్లాలా అని సమీపంలో ఫీల్డర్లను అడిగాను. కానీ వాళ్లెవరూ సముఖత చూపించలేదు. అందుకే రివ్యూ తీసుకోలేదు’’ అని రిషబ్‌ సమీక్షకు వెళ్లకపోవడానికి గల కారణాన్ని వెల్లడించాడు. శార్దూల్‌ ఠాకూర్‌ బౌలింగ్‌లో డేవిడ్‌ బ్యాట్‌కు బంతి తగిలే సమయానికి ముంబయి 33 బంతుల్లో 65 పరుగులు చేయాల్సి ఉంది. అయితే బంతి తాకినట్లు మైదానంలో అంపైర్‌ తపన్‌శర్మ గుర్తించలేకపోయాడు. దిల్లీ కెప్టెన్‌ పంత్‌ కూడా సమీక్ష తీసుకోలేదు. కానీ ఈ తప్పే దిల్లీని ప్లేఆఫ్స్‌కు వెళ్లకుండా అడ్డుకుంది. అవకాశాన్ని సద్వినియోగం చేసుకుంటూ డేవిడ్‌.. ఆ తర్వాత 10 బంతుల్లోనే 34 పరుగులు చేసి మ్యాచ్‌ను ముంబయి వైపు తిప్పేశాడు.