Harmapreet Kaur: పూజ విజృంభణ.. స్మృతి మంధాన జట్టుపై హర్మన్‌ప్రీత్‌ సేన గెలుపు

మహిళల టీ20 ఛాలెంజ్‌
 

పుణె: భారత టీ20 లీగ్‌ తరహాలో మహిళల కోసం నిర్వహిస్తున్న టీ20 ఛాలెంజ్‌ టోర్నమెంట్లో హర్మన్‌ప్రీత్‌ కౌర్‌ జట్టు శుభారంభం చేసింది. సోమవారం ఆ జట్టు 49 పరుగుల తేడాతో స్మృతి మంధాన టీమ్‌ను ఓడించింది. 164 పరుగుల లక్ష్యంతో బరిలోకి దిగిన మంధాన జట్టు నిర్ణీత ఓవర్లలో 9 వికెట్లకు 114 పరుగులే చేయగలిగింది. ఆల్‌రౌండర్‌ పూజ వస్త్రాకర్‌ (4/12) వాళ్ల బ్యాటింగ్‌ ఆర్డర్‌ను కకావికలు చేసింది. సోఫీ ఎకిల్‌స్టోన్‌ (2/19), అలానా కింగ్‌ (2/30), మేఘన సింగ్‌ (1/16) కూడా దెబ్బ తీశారు. ఛేదనలో ఓపెనర్లు స్మృతి మంధాన (34; 23 బంతుల్లో 4×4), హేలీ మాథ్యూస్‌ (18; 14 బంతుల్లో 2×4, 1×6) ధాటిగా ఆరంభించినా.. తొలి వికెట్‌ పడ్డాక ఇన్నింగ్స్‌ గాడి తప్పింది. మొదట హేలీని ఔట్‌ చేసిన పూజ.. ఒకే ఓవర్లో స్మృతి, డంక్లీ (1)లను పెవిలియన్‌ చేర్చి ప్రత్యర్థిని కోలుకోలేకుండా చేసింది. ఆ తర్వాత సోఫీ, అలానా అద్భుతంగా బౌలింగ్‌ చేశారు. రోడ్రిగ్స్‌ (24), రేణుక (14 నాటౌట్‌) పోరాడడంతో మంధాన టీమ్‌ వంద పరుగులు దాటి, కాస్త గౌరవప్రదంగా ఓడింది. అంతకుముందు బ్యాటింగ్‌ చేసిన హర్మన్‌ (37; 29 బంతుల్లో 4×4), హర్లీన్‌ డియోల్‌ (35; 19 బంతుల్లో 5×4), డాటిన్‌ (32; 17 బంతుల్లో 5×4, 1×6) మెరుపులు మెరిపించడంతో ఆమె జట్టు 163 పరుగులకు ఆలౌటైంది. ప్రత్యర్థి బౌలర్లలో హేలీ మాథ్యూస్‌ (3/29), సల్మా ఖాతూన్‌ (2/30) సత్తా చాటారు. డాటిన్‌ మెరుపులతో 5 ఓవర్లలోనే 50 పరుగులు చేసి.. హర్లీన్‌ దూకుడుతో 12వ ఓవర్లోనే 100 దాటిన హర్మన్‌ప్రీత్‌ కౌర్‌ జట్టు  ఇంకా పెద్ద స్కోర్‌ చేసేలా కనిపించింది. కానీ ఇన్నింగ్స్‌ రెండో అర్ధభాగంలో క్రమం తప్పకుండా వికెట్లు పడటంతో మోస్తరు స్కోరుకు పరిమితమైంది.