జ్యోతి మళ్లీ రికార్డు పరుగు

దిల్లీ: రెండు వారాల్లో మూడుసార్లు జాతీయ రికార్డు బద్దలు. తెలుగమ్మాయి జ్యోతి ఎర్రాజి సత్తా ఇది. 100 మీటర్ల హర్డిల్స్‌లో సంచలన అథ్లెట్‌గా ఎదిగిన జ్యోతి మరోసారి జాతీయ రికార్డును సవరించింది. నెదర్లాండ్స్‌లో జరుగుతున్న డీ హ్యారీ షట్లింగ్‌ క్రీడల్లో 100 మీటర్ల హర్డిల్స్‌ పరుగును 13.04 సెకన్లలో పూర్తి చేసిన జ్యోతి తన పేరిటే ఉన్న రికార్డు (13.11 సె)ను అధిగమించింది. అంతకుముందు సైప్రస్‌ టోర్నీలో 13.23 సెకన్లలో రేసు ముగించి.. అనురాధ బిస్వాల్‌ (13.38 సె; 2002లో) పేరిట ఉన్న రికార్డును జ్యోతి బద్దలుకొట్టిన సంగతి తెలిసిందే.