ప్రతీకారానికి వేళాయె

నేడే జపాన్‌తో భారత్‌ సూపర్‌-4 పోరు

 ఆసియాకప్‌ హాకీ

జకర్తా: ఆసియాకప్‌ హాకీ టోర్నమెంట్లో భారత్‌ ప్రతీకారానికి సిద్ధమైంది. గ్రూప్‌ దశలో జపాన్‌ చేతిలో ఓటమికి బదులు తీర్చుకునే అవకాశం మన జట్టుకు వచ్చింది. శనివారం సూపర్‌-4 మ్యాచ్‌లో జపాన్‌తో భారత్‌ తలపడనుంది. లీగ్‌ దశలో మొదట పాకిస్థాన్‌తో డ్రా చేసుకున్న భారత్‌.. రెండో మ్యాచ్‌లో 2-5తో జపాన్‌ చేతిలో ఓడి నాకౌట్‌ అవకాశాలను క్లిష్టం చేసుకుంది. కానీ అద్భుతంగా పుంజుకున్న భారత జట్టు.. ఆఖరి లీగ్‌ మ్యాచ్‌లో 16-0తో ఇండోనేసియాను చిత్తు చిత్తుగా ఓడించి నాకౌట్‌కు అర్హత సాధించింది. భారత్‌, జపాన్‌తో పాటు మలేసియా, దక్షిణ కొరియా సూపర్‌-4లో ఆడనున్నాయి. ప్రతి జట్టు మిగతా జట్లతో ఒక్కో మ్యాచ్‌ ఆడనుంది. తొలి రెండు స్థానాల్లో నిలిచిన జట్లు టైటిల్‌ కోసం ఫైనల్లో తలపడతాయి.