మెరిసిన జెమీమా

లంకపై భారత్‌ గెలుపు

దంబుల్లా: జెమీమా రోడ్రిగ్స్‌ (36 నాటౌట్‌; 27 బంతుల్లో 3×4, 1×6) సత్తా చాటడంతో శ్రీలంకతో మూడు టీ20ల సిరీస్‌లో భారత మహిళల జట్టు శుభారంభం చేసింది. గురువారం తొలి టీ20లో 34 పరుగుల తేడాతో లంకను ఓడించింది. మొదట బ్యాటింగ్‌ చేసిన టీమ్‌ఇండియా 20 ఓవర్లలో 6 వికెట్లకు 138 పరుగులు చేసింది. ఆరంభంలోనే భారత్‌కు ఎదురుదెబ్బ తగిలింది. స్టార్‌ ఓపెనర్‌ స్మృతి మంధాన (1)తో పాటు సబ్బినేని మేఘన (0) ఔటయ్యారు. 17 పరుగులకే 2 వికెట్లు కోల్పోయిన స్థితిలో ఓపెనర్‌ షెఫాలి వర్మ (31; 31 బంతుల్లో 4×4)తో కలిసి కెప్టెన్‌ హర్మన్‌ప్రీత్‌ కౌర్‌ (22; 20 బంతుల్లో 3×4) ఇన్నింగ్స్‌ను నడిపించింది. వీళ్లిద్దరితో పాటు రిచా ఘోష్‌ (11) స్వల్ప వ్యవధిలో వెనుదిరగడంతో భారత్‌ 81/5తో ఇబ్బందుల్లో పడింది. ఈ స్థితిలో పూజ (14), దీప్తిశర్మ (17 నాటౌట్‌)లతో కలిసి విలువైన భాగస్వామ్యాలు నెలకొల్పిన జెమీమా.. భారత్‌కు పోరాడే స్కోరు సాధించిపెట్టింది. లంక బౌలర్లలో ఇనోక రణవీర (3/30), ఒషాది రణసింఘే (2/22) భారత్‌ను కట్టడి చేశారు. ఛేదనలో లంకను రాధ యాదవ్‌ (2/22), దీప్తిశర్మ (1/9), పూజ (1/13), షెఫాలి (1/10) దెబ్బ తీశారు. 86 పరుగులకే సగం వికెట్లు కోల్పోయిన ఆ జట్టు ఛేధనలో వెనుకబడిపోయింది. లంక 20 ఓవర్లలో 5 వికెట్లకు 104 పరుగులే చేయగలిగింది. కవిషా (47 నాటౌట్‌; 49 బంతుల్లో 6×4) ఒంటరి పోరాటం చేసింది. శనివారం రెండో టీ20 జరగనుంది.

రోహిత్‌, పంత్‌.. స్ఫూర్తితో

దంబుల్లా: జట్టులో స్థానం కోల్పోయినప్పుడు రోహిత్‌శర్మ, రిషబ్‌ పంత్‌ మాట్లాడడం స్ఫూర్తినిచ్చిందని మహిళల క్రికెట్‌ జట్టు స్టార్‌ జెమీమా రోడ్రిగ్స్‌ చెప్పింది. ‘‘గత శ్రీలంక పర్యటన నుంచి నా పయనం సాఫీగా సాగట్లేదు. ప్రపంచకప్‌కు ముందు జట్టులో స్థానం కూడా కోల్పోయా. ఈ స్థితిలో భారత్‌ కెప్టెన్‌ రోహిత్‌శర్మ, రిషబ్‌ పంత్‌ మాట్లాడడం నాలో స్ఫూర్తిని నింపింది. ‘ఇలాంటి పరిస్థితులే కెరీర్‌ను నిర్వచిస్తాయి. జట్టులో స్థానం కోల్పోవడాన్ని ప్రతికూలతగా భావించొద్దు. దీన్ని సవాల్‌గా స్వీకరించి ముందుకెళ్లు’ అని వాళ్లు సలహా ఇచ్చారు. ఈ సలహా నా కెరీర్‌కు ఎంతో ఉపయోగపడింది. సానుకూల దృక్పథంతో నా ప్రయత్నాలు తిరిగి ప్రారంభించా. గత నాలుగైదు నెలలుగా నా ఆటను మరింత బాగా అర్థం చేసుకున్నా’’ అని జెమీమా తెలిపింది. శ్రీలంకతో తొలి టీ20లో ఆరంభంలో కాస్త తడబాటుకు గురయ్యానని ఆ తర్వాత కుదురుకుని ఆడానని ఆమె చెప్పింది.