సెమీఫైనల్లో జ్యోతి

ఫైనల్లో రికర్వ్‌ జట్టు

పారిస్‌: ఆర్చరీ ప్రపంచకప్‌ స్టేజ్‌-3 టోర్నమెంట్లో జ్యోతి సురేఖ సెమీఫైనల్‌ చేరింది. మహిళల వ్యక్తిగత కాంపౌండ్‌ సింగిల్స్‌ క్వార్టర్‌ఫైనల్లో జ్యోతి 149-148తో లిసెల్‌ జాట్మా (ఇస్తోనియా)పై విజయం సాధించింది. ఈ పోరులో ఆఖరికి జ్యోతి-లిసెల్‌ సమానంగా నిలిచారు. కానీ నిర్ణయాత్మక షాట్‌లో 10 పాయింట్లు సాధించిన జ్యోతి.. ప్రత్యర్థిని ఒక్క పాయింట్‌ తేడాతో వెనక్కినెట్టి ముందంజ వేసింది. సెమీస్‌లో సోఫి (ఫ్రాన్స్‌)తో జ్యోతి తలపడనుంది. పురుషుల కాంపౌండ్‌ వ్యక్తిగత విభాగంలో అభిషేక్‌ వర్మ 147-148తో జీన్‌ పిజారో (ఫ్యూర్టోరికో) చేతిలో ఓడాడు. మరోవైపు మహిళల రికర్వ్‌ జట్టు ఫైనల్‌కు దూసుకెళ్లింది. క్వాలిఫయింగ్‌లో 13వ ర్యాంకులో నిలిచిన దీపిక కుమారి, అంకిత బాకత్‌, సిమ్రన్‌జీత్‌ కౌర్‌లతో కూడిన మన జట్టు సెమీస్‌లో 56-51, 57-56, 54-55, 55-55తో టర్కీ (గల్నాజ్‌, బాసరన్‌, యాస్మిన్‌)పై విజయం సాధించింది. ఈ పోరులో తొలి రెండు సెట్లు గెలిచిన భారత్‌.. మూడో సెట్లో పోరాడి ఓడింది. ఫైనల్లో అడుగుపెట్టాలంటే నాలుగో సెట్లో కనీసం టై అవసరం కాగా.. ప్రత్యర్థి జట్టుతో సమానంగా 55 పాయింట్లు సాధించి ముందంజ వేసింది. అంతకుముందు క్వార్టర్స్‌లో భారత్‌ 6-0తో బ్రిటన్‌ను చిత్తు చేసింది. ఆదివారం జరిగే తుది పోరులో చైనీస్‌ తైపీతో మన జట్టు అమీతుమీ తేల్చుకోనుంది. పురుషుల టీమ్‌ విభాగంలో తరుణ్‌దీప్‌ రాయ్‌, జయంత తాలుక్‌దార్‌, ప్రవీణ్‌ జాదవ్‌లతో కూడిన భారత జట్టు ప్రిక్వార్టర్స్‌లోనే వెనుదిరిగింది. షూటాఫ్‌లో 4-5తో స్విట్జర్లాండ్‌ చేతిలో ఓడింది.