నిర్ణయించుకునే హక్కు వాళ్లకే

జర్మనీ ఫుట్‌బాల్‌ సమాఖ్య సంచలన నిర్ణయం

బెర్లిన్‌: జర్మనీ ఫుట్‌బాల్‌ సమాఖ్య విప్లవాత్మక నిర్ణయం తీసుకుంది. తమ దేశ ఫుట్‌బాల్‌ రంగంలో సంచలన మార్పుకు శ్రీకారం చుట్టింది. లింగమార్పిడి చేసుకున్న మహిళలు.. అమ్మాయిల విభాగంలో పోటీపడకూడదంటూ ఇటీవల ప్రపంచ స్విమ్మింగ్‌, అంతర్జాతీయ రగ్బీ లీగ్‌ నిషేధం విధించాయి. ఈ నేపథ్యంలో జర్మనీ ఫుట్‌బాల్‌ సమాఖ్య ఏ జట్టులో ఆడాలన్నది క్రీడాకారులకే వదిలేసింది. అమ్మాయిలు లేదా పురుషుల జట్లలో ఇలా తమ ఇష్టం మేరకు ఎవరితో కలిసి ఆడాలనే నిర్ణయం తీసుకునే అవకాశం వాళ్లకు కల్పించింది. తమ లింగత్వం గురించి చెప్పుకోలేని ప్లేయర్లకు ‘విభిన్న’ లేదా ‘పేర్కొనని’ అనే పేరుతో ఆ సమాఖ్య ప్రత్యేక హోదా అందుబాటులోకి తెచ్చింది. ‘‘ఇప్పటికే వివిధ జట్లలో కొనసాగుతున్న ట్రాన్స్‌జెండర్లకూ ఈ నిబంధన వర్తిస్తుంది. వైద్య చికిత్స కోసం ఔషధాలు వాడుతున్న ఇలాంటి ప్లేయర్ల ఆరోగ్యంపై ఆట ప్రభావం చూపనంత వరకూ ఎలాంటి ఇబ్బంది లేదు’’ అని జపాన్‌ ఫుట్‌బాల్‌ వ్యవహారాలను పర్యవేక్షించే డీఎఫ్‌బీ ఓ ప్రకటనలో తెలిపింది. వచ్చే సీజన్‌ నుంచి ఈ కొత్త నిబంధనలు దేశంలో అన్ని రకాల ఫుట్‌బాల్‌ జట్లకు వర్తిస్తాయి. జర్మన్‌ సాకర్‌ సమాఖ్య ప్రపంచంలోనే అతిపెద్దది. వివిధ స్థాయిల్లో కలిపి 24 వేలకు పైగా క్లబ్బులు, లక్షా 30 వేలకు పైగా జట్లు, 22 లక్షలకు పైగా ఆటగాళ్లు ఉన్నారు.