గుజరాత్‌లో జాతీయ క్రీడలు

దిల్లీ: వివిధ కారణాల వల్ల వాయిదా పడుతూ వస్తున్న జాతీయ క్రీడలను ఎట్టకేలకు నిర్వహించబోతున్నారు. ఈ ఏడాది సెప్టెంబర్‌- అక్టోబర్‌ మధ్యలో గుజరాత్‌లో ఈ క్రీడలు జరుగుతాయని భారత ఒలింపిక్‌ సంఘం (ఐఓఏ) కార్యదర్శి రాజీవ్‌ మెహతా బుధవారం ప్రకటించాడు. గుజరాత్‌ ఒలింపిక్‌ సంఘంతో పాటు ఆ రాష్ట్ర ప్రభుత్వం క్రీడల నిర్వహణకు ఆసక్తి చూపడంతో ఈ నిర్ణయం తీసుకున్నట్లు అతను పేర్కొన్నాడు. ‘‘తమ రాష్ట్ర ఒలింపిక్‌ సంఘం ఆసక్తి మేరకు ఈ క్రీడలను నిర్వహిస్తామని గుజరాత్‌ ప్రభుత్వం మాకు లేఖ రాసింది. ఆ ప్రతిపాదనను సంతోషంగా ఒప్పుకున్నాం. సెప్టెంబర్‌ నుంచి అక్టోబర్‌ మధ్యలో ఆ రాష్ట్రంలోని అహ్మదాబాద్‌ సహా అయిదారు నగరాల్లో ఈ క్రీడలు జరుగుతాయి. తేదీలను త్వరలోనే వెల్లడిస్తాం. ఎంతో ఆలస్యం తర్వాత ఈ క్రీడలు జరగబోతున్నందుకు ఆనందంగా ఉంది. త్వరలోనే సర్వసభ్య సమావేశం నిర్వహించి కొన్ని కీలక నిర్ణయాలు తీసుకుంటాం’’ అని రాజీవ్‌ తెలిపాడు. చివరగా 2015లో కేరళలో జాతీయ క్రీడలు జరిగాయి. 2016లో గోవాలో ఈ క్రీడలు నిర్వహించాల్సింది కానీ అందుకు ఆ రాష్ట్రం తగిన ఏర్పాట్లు చేయడంలో విఫలం కావడంతో వాయిదా పడ్డాయి. 2020 నుంచి కరోనా కారణంగా ఆలస్యమవుతూ వచ్చాయి.