అందుకే ఉమ్రాన్‌ చేతికి బంతి

డబ్లిన్‌: మంచి పేస్‌తో బౌలింగ్‌ చేస్తున్నాడనే కారణంతోనే ఐర్లాండ్‌తో రెండో టీ20లో చివరి ఓవర్లో ఉమ్రాన్‌ మాలిక్‌కు బంతిని అందించానని కెప్టెన్‌ హార్దిక్‌ పాండ్య వెల్లడించాడు. ‘‘మ్యాచ్‌లో ఎలాంటి ఆందోళన చెందలేదు. ఒత్తిడికి దూరంగా ఉండాలనుకున్నా. ఉమ్రాన్‌ మంచి పేస్‌తో బౌలింగ్‌ చేస్తుండడంతో అతనికి చివరి ఓవర్లో బంతినిచ్చా. అలాంటి పేస్‌తో అతణ్ని ఎదుర్కోవడం బ్యాటర్లకు కష్టం’’ అని అతను చెప్పాడు. మంగళవారం చివరిదైన రెండో టీ20లో మొదట టీమ్‌ఇండియా 7 వికెట్లకు 225 పరుగులు చేసిన సంగతి తెలిసిందే. ఛేదనలో భయపెట్టిన ఐర్లాండ్‌ చివరకు 20 ఓవర్లలో 5 వికెట్లకు 221 పరుగులు చేసింది. ఆఖరి ఓవర్లో ఆ జట్టు విజయానికి 17 పరుగులు అవసరం కాగా.. ఉమ్రాన్‌ 12 పరుగులిచ్చాడు. దీంతో నాలుగు పరుగుల తేడాతో గెలిచిన భారత్‌ 2-0తో సిరీస్‌ క్లీన్‌స్వీప్‌ చేసింది.