ఫైనల్లో కలైవాణి

దిల్లీ: ఎల్డోరా కప్‌ బాక్సింగ్‌ టోర్నమెంట్లో భారత బాక్సర్‌ కలైవాణి శ్రీనివాసన్‌ ఫైనల్‌కు దూసుకెళ్లింది. కజకిస్థాన్‌లోని నూర్‌ సుల్తాన్‌లో జరుగుతున్న ఈ టోర్నీలో మహిళల 48 కేజీల సెమీఫైనల్లో ఆమె.. ఫార్జానా ఫొజీవా (ఉజ్బెకిస్థాన్‌)ను ఓడించింది. పురుషుల విభాగంలో కుల్‌దీప్‌ కుమార్‌ (48 కేజీలు) కూడా సెమీస్‌ చేరి పతకం ఖాయం చేశాడు. క్వార్టర్స్‌లో కుల్‌దీప్‌ 3-2తో కైరత్‌ యెనర్‌ (కజకిస్థాన్‌)పై విజయం సాధించాడు. 71 కేజీల క్వార్టర్స్‌లో యశ్‌పాల్‌ 0-5తో అస్లాన్‌బెక్‌ (కజకిస్థాన్‌) చేతిలో ఓడగా.. బబితా బిస్త్‌ (81 కేజీలు), జ్యోతి (52 కేజీలు), నీమా (63 కేజీలు) సెమీస్‌లో పరాజయం పాలై కాంస్యాలతో సరిపెట్టుకున్నారు. 50 కేజీల క్వార్టర్స్‌లో సవిత 0-5తో సుకమి (జపాన్‌) చేతిలో ఓటమి చవిచూసింది.