ఓపెన్‌ విభాగంలో మూడు జట్లతో..

చెన్నై: జులై 28న ఆరంభమయ్యే చెస్‌ ఒలింపియాడ్‌లో ఓపెన్‌ విభాగంలో ఆతిథ్య భారత్‌ మూడు జట్లను బరిలో దింపుతోంది. మూడో జట్టులో సూర్య శేఖర గంగూలీ, కార్తికేయన్‌ మురళీ, సేతురామన్‌, అభిజిత్‌ గుప్తా, అభిమన్యు పురాణిక్‌ సభ్యులుగా ఉండనున్నారు. ఓపెన్‌ విభాగంలో భారత్‌-ఎ జట్టు మూడో సీడ్‌గా పోటీలో ఉండగా.. ‘బి’ జట్టుకు 11వ సీడింగ్‌ లభించింది. ‘ఎ’ జట్టులో విదిత్‌ గుజరాతి, పెంటేల హరికృష్ణ, అర్జున్‌ ఇరిగైశి, ఎస్‌ఎల్‌ నారాయణన్‌, శశికిరణ్‌, ‘బి’ జట్టులో నిహల్‌ సరీన్‌, గుకేశ్‌, అధిబన్‌, ప్రజ్ఞానంద, రౌనక్‌ సద్వానీ ఉన్నారు. మహిళల విభాగంలో కోనేరు హంపి, ద్రోణవల్లి హారిక తదితరులతో కూడిన ‘ఎ’ జట్టుకు టాప్‌ సీడింగ్‌ దక్కింది. ‘బి’ జట్టుకు 12వ సీడింగ్‌ లభించింది. ఈసారి చెస్‌ ఒలింపియాడ్‌లో రికార్డు స్థాయిలో 187 జట్లు పోటీపడుతున్నాయి. ఓపెన్‌ కేటగిరిలో అమెరికా టాప్‌ సీడ్‌గా, అజర్‌బైజాన్‌ రెండో సీడ్‌గా బరిలో దిగుతున్నాయి.