ప్రిక్వార్టర్స్‌లో సింధు

సాయి, ప్రణయ్‌, కశ్యప్‌ ముందంజ

కౌలాలంపూర్‌: మలేసియా మాస్టర్స్‌ ప్రపంచ టూర్‌ సూపర్‌ 500 టోర్నీలో భారత స్టార్‌ షట్లర్‌ పి.వి.సింధు శుభారంభం చేసింది. బుధవారం మహిళల సింగిల్స్‌ తొలి రౌండ్లో ఏడో సీడ్‌ సింధు 21-13, 17-21, 21-15తో హి బింగ్‌ జియావొ (చైనా)ను చిత్తుచేసి ప్రిక్వార్టర్స్‌ చేరుకుంది. గతనెల ఇండోనేసియా ఓపెన్‌ తొలి రౌండ్లో బింగ్‌ జియావొ చేతిలో ఎదురైన ఓటమికి బదులు తీర్చుకుంది. మరో మ్యాచ్‌లో సైనా నెహ్వాల్‌ 21-16, 17-21, 14-21తో కిమ్‌ యున్‌ (కొరియా) చేతిలో పోరాడి ఓడింది. పురుషుల సింగిల్స్‌లో భమిడిపాటి సాయి ప్రణీత్‌, పారుపల్లి కశ్యప్‌, హెచ్‌.ఎస్‌.ప్రణయ్‌ ప్రిక్వార్టర్స్‌లో అడుగుపెట్టారు. తొలి రౌండ్లో సాయి ప్రణీత్‌ 21-8, 21-9తో కెవిన్‌ కార్డన్‌ (గ్వాటెమాలా)పై, కశ్యప్‌ 16-21, 21-16, 21-16తో టామి సుగియార్తో (ఇండోనేసియా)పై, ప్రణయ్‌ 21-19, 21-14తో బ్రైస్‌ లెవెర్‌దెజ్‌ (ఫ్రాన్స్‌)పై విజయం సాధించారు. మహిళల డబుల్స్‌ తొలి రౌండ్లో సిక్కిరెడ్డి- అశ్విని పొన్నప్ప జోడీ 19-21, 21-18, 16-21తో ఫెబ్రియానా- ఎమాలియా (ఇండోనేసియా) జంట చేతిలో పోరాడి ఓడింది.