CWG: సెమీఫైనల్లో శ్రీజ

కామన్వెల్త్‌ క్రీడల్లో టీటీలో తెలుగమ్మాయి ఆకుల శ్రీజ దూసుకెళ్తోంది. మిక్స్‌డ్‌ డబుల్స్‌లో సెమీఫైనల్లో అడుగుపెట్టిన ఆమె..మహిళల సింగిల్స్‌లో సెమీస్‌ చేరింది. హోరాహోరీగా జరిగిన మిక్స్‌డ్‌ డబుల్స్‌ క్వార్టర్‌ఫైనల్లో శ్రీజ-ఆచంట శరత్‌కమల్‌ 3-2తో ఫిచ్‌ఫోర్డ్‌-హో తిన్‌ (ఇంగ్లాండ్‌)పై విజయం సాధించారు. మహిళల సింగిల్స్‌ క్వార్టర్స్‌లో శ్రీజ 4-3తో జాంగ్‌ (కెనడా)పై గెలిచింది. మనిక బత్రా మహిళల సింగిల్స్‌, మిక్స్‌డ్‌ డబుల్స్‌లో ఓడిపోయింది. సింగిల్స్‌ క్వార్టర్స్‌లో 0-4తో మి యింగ్‌ (ఆస్ట్రేలియా) చేతిలో ఓడింది. క్వార్టర్స్‌లో మనిక-సత్యన్‌ 2-3తో కరెన్‌-చూంగ్‌ (మలేసియా) చేతిలో తలొంచారు. పురుషుల డబుల్స్‌లో శరత్‌కమల్‌-జ్ఞానశేఖరన్‌ క్వార్టర్స్‌ చేరారు. ప్రిక్వార్టర్స్‌లో శరత్‌ జంట 3-0తో రహీమ్‌-అహ్మద్‌ (బంగ్లాదేశ్‌) జోడీని చిత్తు చేసింది. ఇంకో ప్రిక్వార్టర్స్‌లో హర్మీత్‌దేశాయ్‌-సనీల్‌శెట్టి 3-1తో చాంబర్స్‌-యాన్‌ జిన్‌ (ఆస్ట్రేలియా)ను ఓడించారు.

జ్యోతి విఫలం: మహిళల 100 మీటర్ల హర్డిల్స్‌లో తెలుగమ్మాయి జ్యోతి యర్రాజి విఫలమైంది. హీట్‌-2లో 13.18 సెకన్లలో లక్ష్యాన్ని చేరిన జ్యోతి నాలుగో స్థానంలో నిలిచి కొద్దిలో సెమీస్‌ చేరే అవకాశాన్ని కోల్పోయింది. హీట్‌లో టాప్‌-3 అథ్లెట్లు మాత్రమే ముందంజ వేస్తారు. పురుషుల 4×400 మీటర్ల రిలే రేసులో భారత్‌ ఫైనల్‌ చేరింది. మహ్మద్‌ అనాస్‌, నిర్మల్‌, అజ్మల్‌, అమోజ్‌లతో కూడిన భారత జట్టు హీట్‌-2లో 3 నిమిషాల 6.97 సెకన్లలో లక్ష్యాన్ని చేరి రెండో స్థానంలో నిలిచింది. లాన్‌బౌల్స్‌లో భారత పురుషుల జట్టు ఫైనల్‌ చేరింది. సెమీస్‌లో భారత్‌ (సునీల్‌, నవ్‌నీత్‌, చందన్‌, దినేశ్‌) 13-12తో ఇంగ్లాండ్‌ను ఓడించింది.
క్వార్టర్స్‌లో సింధు, శ్రీకాంత్‌: బ్యాడ్మింటన్‌లో భారత స్టార్‌ షట్లర్లు పి.వి.సింధు, కిదాంబి శ్రీకాంత్‌ క్వార్టర్‌ఫైనల్లో ప్రవేశించారు. మహిళల సింగిల్స్‌ ప్రిక్వార్టర్స్‌లో సింధు 21-10, 21-9తో కొబుగాబె (ఉగాండా)ను ఓడించింది. పురుషుల సింగిల్స్‌ ప్రిక్వార్టర్స్‌లో 21-9, 21-12తో అభివిక్రమ (శ్రీలంక)పై విజయం సాధించాడు. మహిళల డబుల్స్‌లో పుల్లెల గాయత్రి-త్రీసా జాలీ క్వార్టర్స్‌లో ప్రవేశించారు. గాయత్రి జంట 21-2, 21-4తో సాంగ్‌ జెమీమా-మంగ్రా (మారిషస్‌) జోడీని ఓడించింది.