CWG 2022: శ్రీజ-శరత్‌ జోడీకి పతకం ఖాయం

బర్మింగ్‌హామ్‌: తెలంగాణ అమ్మాయి ఆకుల శ్రీజ కామన్వెల్త్‌ క్రీడల్లో పతకాన్ని ఖాయం చేసుకుంది. మిక్స్‌డ్‌ డబుల్స్‌లో ఆచంట శరత్‌కమల్‌తో కలిసి ఆమె ఫైనల్‌కు దూసుకెళ్లింది. నువ్వానేనా అన్నట్లు సాగిన సెమీస్‌ పోరులో శ్రీజ-శరత్‌ 3-2తో నికోలాస్‌-మిన్‌యుంగ్‌ (ఆస్ట్రేలియా)పై విజయం సాధించారు. మహిళల సింగిల్స్‌లో శ్రీజ పోరాటం ముగిసింది. సెమీస్‌లో శ్రీజ 3-4తో మూడుసార్లు ఒలింపిక్‌ పతక విజేత తియాన్‌వీయ్‌ (సింగపూర్‌) చేతిలో ఓడింది. ఇక ఆమె కాంస్యం కోసం పోరాడనుంది. ఆదివారం యాంగ్‌జీ (ఆస్ట్రేలియా)తో శ్రీజ తలపడనుంది. మహిళల డబుల్స్‌ క్వార్టర్స్‌లో శ్రీజ-రీత్‌ టెన్నిసన్‌ 1-3తో వాంగ్‌-జింగ్‌యీ (సింగపూర్‌) చేతిలో ఓటమి చవిచూశారు. పురుషుల సింగిల్స్‌లో శరత్‌కమల్‌, సత్యన్‌ సెమీఫైనల్‌ చేరారు. శరత్‌ 4-0తో యాంగ్‌ ఐజాక్‌ (సింగపూర్‌)పై గెలవగా, సత్యన్‌ 4-2తో సామ్‌ వాకర్‌ (ఇంగ్లాండ్‌)ను ఓడించాడు. పురుషుల డబుల్స్‌లో శరత్‌-సత్యన్‌ ఫైనల్‌ చేరారు. గత కామన్వెల్త్‌ క్రీడల్లో నాలుగు పతకాలు సాధించిన స్టార్‌ పెడ్లర్‌ మనిక బత్రాకు ఈసారి రిక్తహస్తమే మిగిలింది. ఇప్పటికే టీమ్‌, మిక్స్‌డ్‌ డబుల్స్‌, సింగిల్స్‌లో ఓడిన మనిక.. మహిళల డబుల్స్‌లోనూ పరాజయం చవిచూసింది. మనిక-దివ్య 1-3తో చార్లొట్‌-హార్సీ (వేల్స్‌) చేతిలో ఓటమి పాలయ్యారు.