Chess Olympaid: భారత్‌-2 మ్యాచ్‌ డ్రా

మహాబలిపురం: చెస్‌ ఒలింపియాడ్‌లో భారత్‌-2 జట్టు తొమ్మిదో రౌండ్లో అజర్‌బైజాన్‌ను 2-2తో నిలువరించింది. యువ సంచలనం గుకేశ్‌ విజయపరంపరకు అడ్డుకట్టపడింది. తొలి ఎనిమిది గేముల్లో నెగ్గిన అతడు.. మమెద్యరోవ్‌తో గేమ్‌ను డ్రాగా ముగించాడు. మమెదోవ్‌ను నిహాల్‌ సరీన్‌ నిలువరించాడు. వసీఫ్‌పై ప్రజ్ఞానంద నెగ్గగా.. అబసోవ్‌ చేతిలో రౌనక్‌ ఓడిపోయాడు. భారత్‌-2 రెండో స్థానంలో కొనసాగుతోంది. హరికృష్ణ, విదిత్‌, అర్జున్‌, శశికిరణ్‌లతో కూడిన భారత్‌-1 జట్టు 3-1తో బ్రెజిల్‌పై నెగ్గింది. భారత్‌-3 జట్టు 3-1తో పరాగ్వే జట్టును ఓడించింది. మహిళల విభాగంలో టాప్‌ సీడ్‌ భారత్‌-1 జట్టు (హంపి, హారిక, వైశాలి, తానియా) 1.5-2.5తో పోలెండ్‌ చేతిలో ఓటమి చవిచూసింది. అగ్రస్థానం నుంచి రెండో స్థానానికి పడిపోయింది. భారత్‌-2 జట్టు 4-0తో స్విట్జర్లాండ్‌పై నెగ్గగా.. భారత్‌-3 జట్టు 3-1తో ఎస్తోనియాను ఓడించింది.