సెరెనా మరో ఓటమి

మేసన్‌: రిటైర్మెంట్‌ దిశగా సాగుతున్న టెన్నిస్‌ దిగ్గజం సెరెనా విలియమ్స్‌ మరో టోర్నీ నుంచి ఓటమితో నిష్క్రమించింది. తన కెరీర్‌లో చివరిసారిగా వెస్టర్న్, సౌథర్న్‌ ఓపెన్‌ (సిన్సినాటి టోర్నీ)లో బరిలో దిగిన ఈ 40 ఏళ్ల మాజీ నంబర్‌వన్‌ మహిళల సింగిల్స్‌ తొలి రౌండ్లోనే పరాజయం పాలైంది. ఈ అమెరికా క్రీడాకారిణి 4-6, 0-6 తేడాతో యుఎస్‌ ఓపెన్‌ ఛాంపియన్‌ ఎమ్మా రదుకాను (బ్రిటన్‌) చేతిలో ఓడింది. 19 ఏళ్ల ప్రత్యర్థితో పోరులో తొలి సెట్లో కాస్త పోరాడిన సెరెనా.. రెండో సెట్లో పూర్తిగా చేతులెత్తేసింది. ఈ నెల 29న ఆరంభమయ్యే యుఎస్‌ ఓపెన్‌తో ఆమె ఆటకు వీడ్కోలు పలుకుతుందనే ఊహాగానాలు వినిపిస్తున్నాయి. మరోవైపు ఒసాక (జపాన్‌) 4-6, 5-7తో షువాయి జంగ్‌ (చైనా) చేతిలో అనూహ్య ఓటమి చవిచూసింది. కోకో గాఫ్‌ (అమెరికా) గాయం కారణంగా మ్యాచ్‌ మధ్యలో తప్పుకుంది. ప్లిస్కోవా (చెక్‌ రిపబ్లిక్‌) 7-5, 6-1తో వీనస్‌ విలియమ్స్‌ (అమెరికా)పై నెగ్గింది. పురుషుల సింగిల్స్‌లో మెద్వెదెవ్‌ (రష్యా) మూడో రౌండ్లో అడుగుపెట్టాడు. ఈ ప్రపంచ నంబర్‌వన్‌ ఆటగాడు రెండో రౌండ్లో 6-4, 7-5తో బోటిచ్‌ (నెదర్లాండ్స్‌)పై గెలిచాడు.