విజృంభించిన శార్దూల్, సేన్‌

భారత్‌-ఏ బోణీ

చెన్నై: న్యూజిలాండ్‌-ఏతో ఇప్పటికే అనధికార టెస్టు సిరీస్‌ను చేజిక్కించుకున్న భారత్‌-ఏ.. మూడు వన్డేల సిరీస్‌లోనూ ఘనంగా బోణీ కొట్టింది. పేసర్లు శార్దూల్‌ ఠాకూర్‌ (4/32), కుల్‌దీప్‌ సేన్‌ (3/30) విజృంభించడంతో గురువారం జరిగిన తొలి వన్డేలో 7 వికెట్ల తేడాతో కివీస్‌-ఏను ఓడించింది. ఈ మ్యాచ్‌లో మొదట బ్యాటింగ్‌ చేసిన న్యూజిలాండ్‌-ఏను శార్దూల్, కుల్‌దీప్‌ దెబ్బ తీశారు. 40.2 ఓవర్లలో 167 పరుగులకే ఆలౌట్‌ చేశారు. రిప్పన్‌ (61; 104 బంతుల్లో 4×4), వాకర్‌ (36; 49 బంతుల్లో 3×4, 1×6) పోరాడకపోతే ఆ జట్టు ఆ మాత్రం స్కోరు కూడా చేయలేకపోయేది. లక్ష్యాన్ని భారత్‌ 31.5 ఓవర్లలో 3 వికెట్లు కోల్పోయి అందుకుంది. ఓపెనర్‌ పృథ్వీ షా (17) త్వరగా ఔటైనా.. రుతురాజ్‌ గైక్వాడ్‌ (41; 54 బంతుల్లో 3×4, 2×6), రాహుల్‌ త్రిపాఠి (31; 40 బంతుల్లో 4×4) జట్టును విజయపథంలో నడిపించారు. వీళ్లిద్దరూ స్వల్ప వ్యవధిలో వెనుదిరిగినా.. రజత్‌ పాటిదార్‌ (45 నాటౌట్‌; 41 బంతుల్లో 7×4), కెప్టెన్‌ సంజు శాంసన్‌ (29 నాటౌట్‌; 32 బంతుల్లో 1×4, 3×6) నాలుగో వికెట్‌కు 69 పరుగులు జత చేసి భారత్‌ను గెలిపించారు.