క్వార్టర్స్‌లో అర్జున్, ప్రజ్ఞానంద

న్యూయార్క్‌: జులియస్‌ బేర్‌ జనరేషన్‌ కప్‌ ఆన్‌లైన్‌ ర్యాపిడ్‌ చెస్‌ టోర్నీలో భారత టేనేజీ సంచలనాలు అర్జున్‌ ఇరిగేశి, ప్రజ్ఞానంద క్వార్టర్స్‌కు అర్హత సాధించారు. ప్రిలిమినరీ దశలో 19 ఏళ్ల తెలంగాణ గ్రాండ్‌మాస్టర్‌ అర్జున్‌ రెండు, 17 ఏళ్ల తమిళనాడు గ్రాండ్‌మాస్టర్‌ ప్రజ్ఞానంద నాలుగో స్థానంలో నిలిచారు. 15 రౌండ్ల ప్రిలిమినరీ దశ ముగిసే సరికి తొలి ఎనిమిది స్థానాల్లో చోటు దక్కించుకున్న ఆటగాళ్లు క్వార్టర్స్‌ చేరారు. ఈ దశ పోటీల చివరి రోజు అర్జున్‌ చెప్పుకోదగ్గ ప్రదర్శన చేయలేకపోయాడు. రదోస్లావ్‌ (పోలండ్‌)తో గేమ్‌ను డ్రా చేసుకున్న అతను.. విన్సెంట్‌ (జర్మనీ), అనీష్‌ (నెదర్లాండ్స్‌) చేతిలో ఓడాడు. దీంతో ఏడు విజయాలు, నాలుగేసి చొప్పున డ్రాలు, ఓటములతో మొత్తం 25 పాయింట్లతో రెండో స్థానంలో నిలిచాడు. మరోవైపు ప్రజ్ఞానంద అయిదు విజయాలు, ఎనిమిది డ్రాలు, రెండు ఓటములతో కలిపి మొత్తం 23 పాయింట్లతో నాలుగో స్థానం దక్కించుకున్నాడు. మరో భారత ఆటగాడు అధిబన్‌ 16వ స్థానంతో టోర్నీ నుంచి నిష్క్రమించాడు. ప్రిలిమినరీ దశలో పూర్తి ఆధిపత్యం ప్రదర్శించిన ప్రపంచ ఛాంపియన్‌ మాగ్నస్‌ కార్ల్‌సన్‌ 34 పాయింట్లతో అగ్రస్థానాన్ని కైవసం చేసుకున్నాడు. నీమన్‌తో మ్యాచ్‌ నుంచి తప్పుకోవడం మినహా మిగతా గేమ్‌ల్లో అతను అజేయంగా నిలిచాడు. ఏకంగా 10 విజయాలు సాధించాడు. క్వార్టర్స్‌లో క్రిస్టోఫర్‌తో అర్జున్, విన్సెంట్‌తో ప్రజ్ఞానంద తలపడతారు.