షూటింగ్‌లో చరిత్ర

షాట్‌గన్‌ ప్రపంచ ఛాంపియన్‌షిప్‌లో పసిడి

ఒసైజెక్‌ (క్రొయేషియా): ఐఎస్‌ఎస్‌ఎఫ్‌ షాట్‌గన్‌ ప్రపంచ ఛాంపియన్‌షిప్‌లో భారత షూటర్లు అదరగొట్టారు. జూనియర్‌ పురుషుల ట్రాప్‌ విభాగంలో స్వర్ణం నెగ్గి చరిత్ర సృష్టించారు. ఈ ఛాంపియన్‌షిప్స్‌ చరిత్రలో దేశానికి తొలి పతకం అందించారు. శనివారం ఫైనల్లో శపథ్‌, శార్దూల్‌, ఆర్యతో కూడిన భారత త్రయం 6-4 తేడాతో ఇటలీపై విజయం సాధించింది. కాంస్యం అమెరికా ఖాతాలో చేరింది. అంతకుముందు అర్హత రౌండ్లో 205 పాయింట్లతో ఇటలీ తర్వాత రెండో స్థానంలో నిలిచి మన కుర్రాళ్లు తుదిపోరుకు చేరారు. ఇక పసిడి పోరులో ఓ దశలో 0-4తో వెనకబడ్డ భారత జట్టు అద్భుతంగా పుంజుకుంది. తొలి రెండు షూటాఫ్‌ల్లో వెనకబడ్డ షూటర్లు.. ఆ తర్వాత నిలకడ ప్రదర్శించారు. కచ్చితమైన గురితో లక్ష్యాన్ని చేరుకుని ఛాంపియన్లుగా నిలిచారు.