కెరీర్‌ మొదలైంది జాతీయ క్రీడలతోనే

హైదరాబాద్‌: జాతీయ క్రీడలతోనే తన కెరీర్‌ మొదలైందని, ఈ క్రీడలు తనకెంతో ప్రత్యేకమని భారత టెన్నిస్‌ స్టార్‌ సానియా మీర్జా తెలిపింది. గుజరాత్‌లో ఈ నెల 27న 36వ జాతీయ క్రీడలు అధికారికంగా ఆరంభం కానున్న నేపథ్యంలో సానియా ఈ క్రీడలతో తన అనుబంధాన్ని సానియా గుర్తు చేసుకుంది. ‘‘2002 జాతీయ క్రీడల్లో పోటీపడినప్పుడు నా వయసు 16 ఏళ్లే. ఈ క్రీడల్లో రాణించడం ద్వారా వెలుగులోకి వచ్చా. నా అంతర్జాతీయ కెరీర్‌కు గట్టి పునాది పడింది అప్పుడే. మన సత్తా ఏంటో తెలుసుకోవడానికి జాతీయ క్రీడలు మంచి వేదిక. దేశవ్యాప్తంగా నాణ్యమైన అథ్లెట్లు ఈ క్రీడలకు వస్తారు. ఇక్కడ రాణిస్తే అంతర్జాతీయ స్థాయిలో సత్తా చాటేందుకు ఆత్మవిశ్వాసాన్ని పెంచుకోవచ్చు. త్వరలో జరిగే జాతీయ క్రీడల్లో పాల్గొనబోతున్న అథ్లెట్లకు శుభాకాంక్షలు’’ అని సానియా చెప్పింది. భారత్‌లో మహిళల టెన్నిస్‌కు చిరునామాగా నిలిచిన సానియా డబుల్స్‌, మిక్స్‌డ్‌ డబుల్స్‌ కలిపి ఆరు గ్రాండ్‌స్లామ్‌ టైటిళ్లు నెగ్గింది.