ఇకపై క్రీజులో ఉంటా

లండన్‌: భారత్‌ మహిళల క్రికెట్‌ జట్టుతో ఆఖరిదైన మూడో వన్డేలో తనను దీప్తిశర్మ మన్కడింగ్‌ చేయడంపై ఇంగ్లాండ్‌ బ్యాటర్‌ చార్లీ డీన్‌ తొలిసారి స్పందించింది. ఈ మేరకు ఇన్‌స్టాగ్రామ్‌లో పోస్టు పెట్టింది. ‘‘ఈ వేసవికి ఆసక్తికర ముగింపు. లార్డ్స్‌లో ఇంగ్లాండ్‌ జెర్సీ ధరించి బరిలో దిగడాన్ని గొప్ప గౌరవంగా భావిస్తున్నా. ఇకపై క్రీజులోనే ఉంటా’’ అని డీన్‌ ఆ పోస్టులో పేర్కొంది. చార్లీ రనౌట్‌ ఘటనపై ఇంగ్లాండ్‌ మాజీ ఆటగాళ్లు భారత్‌పై విమర్శలు ఎక్కుపెట్టిన నేపథ్యంలో ఈ వ్యాఖ్యలు ప్రాధాన్యాన్ని సంతరించుకున్నాయి. తాము ఒకటికి రెండుసార్లు హెచ్చరించిన తర్వాతే డీన్‌ను రనౌట్‌ చేసినట్లు దీప్తి తాజాగా చెప్పగా.. దీప్తి అబద్దం ఆడుతోందని ఎలాంటి హెచ్చరికలు చేయలేదని ఇంగ్లాండ్‌ స్టార్‌ బ్యాటర్‌ హీదర్‌ నైట్‌ అంది.