ఓటమి చిరాకు.. ఒకరిపై మరొకరు పిడిగుద్దులు

సిడ్నీ: మహిళల బాస్కెట్‌బాల్‌ ప్రపంచకప్‌ సందర్భంగా ఒకరిపై మరొకరు పిడిగుద్దులతో విరుచుకుపడ్డ మాలి జట్టు క్రీడాకారిణులు తాజాగా క్షమాపణ చెప్పారు. సెర్బియాతో ఓటమి తర్వాత మీడియాకు కేటాయించిన చోట సలిమాటో, ఎలిసబెత్‌ పెనుగులాడుతూ కనిపించారు. మొదట ఎలిసబెత్‌పై సలిమాటో పంచ్‌లు విసిరింది. వెంటనే మిగతా మాలి క్రీడాకారిణులు వీళ్లను విడదీసేందుకు ప్రయత్నించారు. ఈ ఘటన సెర్బియా మీడియాకు చిక్కింది. దీనిపై ఫిబా విచారణ జరుపుతోంది. ‘‘ఆ ఓటమితో మాకు చిరాకు కలిగింది. ఫిబా, ప్రపంచ బాస్కెట్‌బాల్‌, ప్రపంచకప్‌కు క్షమాపణ చెబుతున్నాం. కావాలని మేం అలా చేయలేదు’’ అని ఇద్దరి తరపున సలిమాటో పేర్కొంది. ఆ తర్వాత కెనడాతో మ్యాచ్‌లో ఈ ఇద్దరూ బరిలో దిగారు.