భారత్‌-ఎ క్లీన్‌స్వీప్‌

చెన్నై: న్యూజిలాండ్‌-ఎతో అనధికార మూడు వన్డేల సిరీస్‌ను భారత్‌-ఎ 3-0తో క్లీన్‌స్వీప్‌ చేసింది. మంగళవారం ఆఖరిదైన మూడో వన్డేలో భారత్‌-ఎ 106 పరుగుల తేడాతో ప్రత్యర్థిని చిత్తు చేసింది. మొదట బ్యాటింగ్‌ చేసిన మన జట్టు 49.3 ఓవర్లలో 284 పరుగులు చేసింది. కెప్టెన్‌ సంజు శాంసన్‌ (54; 68 బంతుల్లో 1×4, 2×6), తిలక్‌వర్మ (50; 62 బంతుల్లో 1×4, 3×6), శార్దూల్‌ ఠాకూర్‌ (51; 33 బంతుల్లో 4×4, 3×6) అర్ధ సెంచరీలతో మెరిశారు. ఆరంభంలో శాంసన్‌, తిలక్‌వర్మ ఇన్నింగ్స్‌కు గట్టి పునాది వేస్తే.. ఆఖర్లో శార్దూల్‌ మెరుపు షాట్లతో జట్టుకు మంచి స్కోరు అందించాడు. రాజ్‌ బవా (4/11), రాహుల్‌ చాహర్‌ (2/39), కుల్‌దీప్‌ యాదవ్‌ (2/29) విజృంభించడంతో ఛేదనలో కివీస్‌-ఎ 38.3 ఓవర్లలో 178 పరుగులకే ఆలౌటైంది. డేన్‌ క్లెవర్‌ (83; 89 బంతుల్లో 9×4, 2×6) పోరాటం ఆ జట్టుకు విజయాన్ని అందించలేకపోయింది.