పరిస్థితుల్ని అర్థం చేసుకోవడంపై దృష్టి: అర్ష్‌దీప్‌

తిరువనంతపురం: టీ20 ప్రపంచకప్‌కు ముందు పరిస్థితుల్ని అర్థం చేసుకోవడంపై దృష్టిసారించినట్లు టీమ్‌ఇండియా యువ పేసర్‌ అర్ష్‌దీప్‌సింగ్‌ అన్నాడు. దక్షిణాప్రికాతో తొలి టీ20 మ్యాచ్‌లో అర్ష్‌దీప్‌ (3/32) కొత్త బంతితో నిప్పులు చెరిగి ‘మ్యాన్‌ ఆఫ్‌ ద మ్యాచ్‌’ అవార్డు అందుకున్నాడు. ‘‘మ్యాచ్‌ ఆరంభంలోనే వికెట్లు తీయడం గొప్ప అనుభూతినిస్తుంది. పిచ్‌పై బంతి స్వింగ్‌ అవుతుంది. సరైన ప్రాంతాల్లో బంతిని సంధించడం ఫలితాన్నిచ్చింది. పరిస్థితుల్ని అర్థం చేసుకోవాలన్నది జట్టు ప్రధాన ఉద్దేశం. ఎలాంటి పరిస్థితులు.. ఏ సందర్భంలో ఉన్నా జట్టు అవసరాలకు తగ్గట్లుగా ఆడాలి. ఆస్ట్రేలియాకు వెళ్లినప్పుడు అక్కడి పరిస్థితుల్ని పరిశీలిస్తాం. అక్కడ సత్తాచాటాలని భావిస్తున్నా. మెగా టోర్నీకి ముందు అన్ని అంశాలను స్పృశిస్తున్నాం. అన్ని వ్యూహాల్ని మైదానంలో అమలు చేసేందుకు కసరత్తు చేస్తున్నాం. బుధవారం ప్రదర్శన గొప్ప పవర్‌ ప్లే బౌలింగ్‌కు నిదర్శనం. రానున్న రోజుల్లో మరింత అద్భుతంగా రాణించాలని అనుకుంటున్నాం’’ అని అర్ష్‌దీప్‌ వివరించాడు.