చెలరేగిన నమన్‌, ఇర్ఫాన్‌

ఫైనల్లో ఇండియా లెజెండ్స్‌

రాయ్‌పుర్‌: రోడ్డు భద్రత ప్రపంచ టీ20 సిరీస్‌లో ఇండియా లెజెండ్స్‌ ఫైనల్లోకి దూసుకెళ్లింది. ‘మ్యాన్‌ ఆఫ్‌ ద మ్యాచ్‌’ నమన్‌  ఓజా (90 నాటౌట్‌; 62 బంతుల్లో 7×4, 5×6), ఇర్ఫాన్‌  పఠాన్‌ (37 నాటౌట్‌; 12 బంతుల్లో 2×4, 4×6) ఆకాశమే హద్దుగా చెలరేగడంతో జరిగిన తొలి సెమీస్‌లో ఇండియా లెజెండ్స్‌ 5 వికెట్ల తేడాతో ఆస్ట్రేలియా లెజెండ్స్‌పై విజయం సాధించింది. మొదట ఆసీస్‌ లెజెండ్స్‌ 20 ఓవర్లలో 5 వికెట్లకు 171 పరుగులు రాబట్టింది. కెప్టెన్‌ షేన్‌ వాట్సన్‌ (30; 21 బంతుల్లో 6×4), అలెక్స్‌ డూలన్‌ (35; 31 బంతుల్లో 5×4), బెన్‌డంక్‌ (46; 26 బంతుల్లో 5×4, 2×6), కామెరూన్‌ వైట్‌ (30 నాటౌట్‌; 18 బంతుల్లో 1×4, 2×6) చెలరేగారు. ఇండియా లెజెండ్స్‌ బౌలర్లలో అభిమన్యు మిథున్‌ (2/25), రాహుల్‌శర్మ (1/20), యూసుఫ్‌ పఠాన్‌ (2/36) సఫలమయ్యారు. ఇండియా లెజెండ్స్‌ 19.2 ఓవర్లలో 5 వికెట్లు కోల్పోయి లక్ష్యాన్ని అందుకుంది. కెప్టెన్‌ సచిన్‌ తెందుల్కర్‌ (10), సురేశ్‌ రైనా (11), యువరాజ్‌సింగ్‌ (18), యూసుఫ్‌ పఠాన్‌ (1)లు నిరాశపరిచినా నమన్‌, ఇర్ఫాన్‌ పని పూర్తిచేశారు. శుక్రవారం జరిగే రెండో సెమీస్‌లో శ్రీలంక లెజెండ్స్‌తో వెస్టిండీస్‌ లెజెండ్స్‌ తలపడనుంది.