ఇంగ్లాండ్‌ గెలుపు

సిరీస్‌ మళ్లీ సమం

లాహోర్‌: ఏడు టీ20ల సిరీస్‌లో పాకిస్థాన్‌, ఇంగ్లాండ్‌ నువ్వా నేనా అన్నట్లు తలపడుతున్నాయి. సిరీస్‌లో వెనుకబడ్డ ఇంగ్లాండ్‌ మళ్లీ పుంజుకుంది. శుక్రవారం ఏకపక్షంగా సాగిన ఆరో టీ20లో ఆ జట్టు 8 వికెట్ల తేడాతో నెగ్గి సిరీస్‌ను 3-3తో సమం చేసింది. మొదట కెప్టెన్‌ బాబర్‌ అజామ్‌ (87 నాటౌట్‌; 59 బంతుల్లో 7×4, 3×6) మెరుపులతో పాక్‌ 6 వికెట్లకు 169 పరుగులు చేసింది. సామ్‌ కరన్‌ (2/26), డేవిడ్‌ విల్లీ (2/32) ఆ జట్టును దెబ్బ తీశారు. అనంతరం ఫిల్‌ సాల్ట్‌ (88 నాటౌట్‌; 41 బంతుల్లో 13×4, 3×6) చెలరేగిపోవడంతో ఇంగ్లాండ్‌ 14.3 ఓవర్లలో 2 వికెట్లు మాత్రమే కోల్పోయి లక్ష్యాన్ని ఛేదించింది. ఆరంభం నుంచే ధాటిగా బ్యాటింగ్‌ చేసిన సాల్ట్‌.. హేల్స్‌ (27), మలన్‌ (26), డకెట్‌ (26 నాటౌట్‌)లతో భాగస్వామ్యాలు నెలకొల్పి ఇంగ్లాండ్‌ను గెలిపించాడు. పాక్‌ బౌలర్లలో షాదాబ్‌ ఖాన్‌ (2/34) సత్తా చాటాడు. నిర్ణయాత్మక చివరి టీ20 ఆదివారం జరుగుతుంది.