జర్మనీ చేతిలో భారత్‌ ఓటమి

పపంచ టీమ్‌ టీటీ

చెంగ్డూ: ప్రపంచ టీమ్‌ టేబుల్‌ టెన్నిస్‌ ఛాంపియన్‌షిప్‌లో భారత మహిళల జట్టు పోరాడి ఓడిపోయింది. శనివారం జరిగిన గ్రూప్‌-5 పోరులో భారత్‌ 2-3తో జర్మనీ చేతిలో పరాజయం చవిచూసింది. తొలి సింగిల్స్‌లో మనిక బత్రా 3-11, 1-11, 2-11తో ప్రపంచ ఎనిమిదో ర్యాంకర్‌ యింగ్‌ హాన్‌ చేతిలో ఓడగా.. రెండో సింగిల్స్‌లో శ్రీజ 11-9, 12-10, 11-7తో నీనాను ఓడించి స్కోర్లు సమం చేసింది. ఆ తర్వాత దివ్య 11-9, 8-11, 11-6, 13-11తో సబైన్‌ వింటర్‌పై గెలవడంతో భారత్‌ 2-1తో ఆధిక్యంలోకి దూసుకెళ్లింది. కానీ మనిక తడబడటం మన జట్టును ముంచింది. ఆమె 11-7, 6-11, 7-11, 8-11తో నీనా చేతిలో ఓడడంతో స్కోర్లు 2-2తో సమమయ్యాయి. ఆ తర్వాత మరో సింగిల్స్‌లో శ్రీజ 3-11, 5-11, 4-11తో తలొంచడంతో భారత్‌కు పరాజయం తప్పలేదు. ప్రస్తుతం భారత్‌ (ఒక పాయింట్‌) నాలుగు జట్లు ఆడుతున్న గ్రూప్‌లో చివరి స్థానంలో ఉంది. మరోవైపు భారత పురుషుల జట్టు 3-0తో ఉజ్బెకిస్థాన్‌ను ఓడించి శుభారంభం చేసింది. తొలి సింగిల్స్‌లో హర్మీత్‌ దేశాయ్‌ 11-9, 11-9, 11-1తో ఖోలికోవ్‌పై గెలవగా, సత్యన్‌ 11-3, 11-6, 11-9తో అనొర్‌బెర్‌ను ఓడించి ఆధిక్యాన్ని రెట్టింపు చేశాడు. మూడో సింగిల్స్‌లో మానవ్‌ థక్కర్‌ 11-8, 11-5, 11-5తో షోక్‌రుక్‌పై గెలిచి భారత్‌ విజయాన్ని సంపూర్ణం చేశాడు. ఈ విజయంతో గ్రూప్‌-2లో భారత్‌ (2 పాయింట్లు).. ఫ్రాన్స్‌ (4) తర్వాత రెండో స్థానంలో ఉంది.