నిరాశ కలిగించింది

దిల్లీ: టీ20 ప్రపంచకప్‌కు దూరమవడం నిరాశ కలిగించిందని టీమ్‌ఇండియా స్టార్‌ పేసర్‌ జస్‌ప్రీత్‌ బుమ్రా అన్నాడు. వెన్ను గాయం నుంచి కోలుకోగానే జట్టును ఉత్సాహపరుస్తానని తెలిపాడు. ‘‘ఈసారి టీ20 ప్రపంచకప్‌లో భాగం కానందుకు నిరాశగా ఉంది. నాకు మద్దతుగా నిలిచిన వారికి కృతజ్ఞతలు. నేను కోలుకోగానే ఆస్ట్రేలియాలో టీమ్‌ఇండియా బాగా ఆడేలా నా వంతు ప్రోత్సాహం అందిస్తా’’ అని బుమ్రా ట్వీట్‌ చేశాడు. ప్రపంచకప్‌ కోసం బుమ్రా స్థానంలో మరో ఆటగాడిని బీసీసీఐ ఇంకా ప్రకటించలేదు. స్టాండ్‌బైలుగా ఎంపికైన దీపక్‌ చాహర్‌, మహ్మద్‌ షమిల్లో ఒకరు జట్టులోకి వచ్చే అవకాశముంది.