దేశం కోసం మళ్లీ వస్తా

దోహా: గాయం నుంచి కోలుకుని దేశం కోసం మళ్లీ బరిలో దిగుతానని ఆశాభావం వ్యక్తం చేశాడు బ్రెజిల్‌ స్టార్‌ నెయ్‌మార్‌. ప్రపంచకప్‌లో సెర్బియాతో తొలి మ్యాచ్‌లో ఈ స్ట్రైకర్‌ చీలమండకు గాయమైంది. దీంతో గ్రూప్‌ దశ మ్యాచ్‌లకు అతడు దూరమయ్యాడు. గాయమైన చీలమండ ఫొటోను తాజాగా ఇన్‌స్టాగ్రామ్‌లో పంచుకున్న నెయ్‌మార్‌ ‘అత్యంత క్లిష్టమైన ఘడియలు’ అనే శీర్షిక జోడించాడు. ‘‘గాయపడ్డాను. బాధగా ఉంది. ఆడలేకపోతున్నందుకు వేదనగా అనిపిస్తోంది. కానీ త్వరలోనే మళ్లీ తిరిగొస్తా. ఎందుకంటే దేశం కోసం.. నా సహచరుల కోసం ఏదైనా చేయగలననిపిస్తోంది. జీవితంలో నాకేదీ తేలిగ్గా దక్కలేదు. కలలను వెంటాడుతూ సాకారం చేసుకున్నా’’ అని నెయ్‌మార్‌ అన్నాడు. స్విట్జర్లాండ్‌తో బ్రెజిల్‌ ఆడే తర్వాత మ్యాచ్‌కు నెయ్‌మార్‌ దూరం కావడంతో అతడి స్థానంలో ఎవరు బరిలో దిగుతారనేది కోచ్‌ టైట్‌ ఇంకా ప్రకటించలేదు.