పరాగ్‌ మెరుపు శతకం.. క్వార్టర్స్‌లో అస్సాం

అహ్మదాబాద్‌: రియాన్‌ పరాగ్‌ (174; 116 బంతుల్లో 12×4, 12×6) మెరుపు శతకంతో సత్తాచాటడంతో విజయ్‌ హజారె ట్రోఫీలో అస్సాం సెమీఫైనల్లోకి దూసుకెళ్లింది. సోమవారం అస్సాం ఏడు వికెట్ల తేడాతో జమ్ము-కశ్మీర్‌పై విజయం సాధించింది. మొదట జమ్ము-కశ్మీర్‌ 7 వికెట్లకు 350 పరుగుల భారీస్కోరు నమోదు చేసింది. శుభం ఖజూరియా (120; 84 బంతుల్లో 8×4, 8×6), హెనన్‌ నజీర్‌ (124; 113 బంతుల్లో 5×4, 5×6) సెంచరీలతో అదరగొట్టారు.  అనంతరం అస్సాం 46.1 ఓవర్లలోనే  3 వికెట్లు కోల్పోయి లక్ష్యాన్ని ఛేదించింది. పరాగ్‌తో పాటు రిషవ్‌ దాస్‌ (114 నాటౌట్‌; 118 బంతుల్లో 11×4, 1×6) అజేయ సెంచరీతో మెరిశాడు. మరో క్వార్టర్స్‌ కర్ణాటక 4 వికెట్ల తేడాతో పంజాబ్‌ను ఓడించింది. మొదట పంజాబ్‌ 235 పరుగులకు ఆలౌటైంది. అభిషేక్‌ శర్మ (109) సెంచరీ సాధించాడు. కర్ణాటక బౌలర్లలో కావేరప్ప (4/40) సత్తా చాటాడు. అనంతరం సమర్థ్‌ (71), శ్రేయస్‌ గోపాల్‌ (42), మనీష్‌ పాండే (35) రాణించడంతో కర్ణాటక 49.2 ఓవర్లలో 6 వికెట్లు కోల్పోయి లక్ష్యాన్ని ఛేదించింది. ఇంకో క్వార్టర్స్‌లో సౌరాష్ట్ర 44 పరుగుల తేడాతో తమిళనాడుపై నెగ్గింది. మొదట హార్విక్‌ దేశాయ్‌ (61), చిరాగ్‌ జాని (52), అర్పిత్‌ (51) రాణించడంతో సౌరాష్ట్ర 8 వికెట్లకు 293 పరుగులు చేసింది. చిరాగ్‌ జాని (3/53), ధర్మేంద్ర జడేజా (2/48), పార్థ్‌ భట్‌ (2/47)ల ధాటికి తమిళనాడు 48 ఓవర్లలో 249 పరుగులకే ఆలౌటైంది. బాబా ఇంద్రజిత్‌ (53), సాయికిశోర్‌ (74) మినహా బ్యాటర్లు విఫలమయ్యారు. బుధవారం సెమీస్‌లో కర్ణాటకతో సౌరాష్ట్ర, అస్సాంతో మహారాష్ట్ర తలపడతాయి.