49 శాతం మంది క్రికెటర్లు లీగ్‌ల వైపే

దిల్లీ: దేశం తరఫున అంతర్జాతీయ క్రికెట్‌ ఆడడం కంటే టీ20ల్లో లీగ్‌ల్లో పాల్గొనడానికి ఆసక్తి చూపే క్రికెటర్ల సంఖ్య అంతకంతకూ పెరుగుతోంది. లీగ్‌ల్లో ఆడడం కోసం తమ దేశ బోర్డులతో ఒప్పందాలను వదులుకోవడానికి ప్రపంచవ్యాప్తంగా 49 శాతం ఆటగాళ్లు మొగ్గు చూపుతున్నట్లుగా అంతర్జాతీయ క్రికెటర్ల సంఘాల సమాఖ్య (ఫికా) జరిపిన ఒక సర్వేలో తేలడం గమనార్హం. తమ వార్షిక నివేదికలో  ఫికా ఈ విషయాన్ని వెల్లడించింది. అయితే భారత క్రికెటర్లకు ప్రత్యేకంగా సంఘం లేకపోవడం, ఫికా పరిధిలో వారు లేకపోవడం వల్ల వారిని ఈ సర్వే కోసం పరిగణనలోకి తీసుకోలేదు. మిగతా దేశాల క్రికెటర్లలో మాత్రం 49 శాతం మంది ఓటు లీగ్‌లకే అని తేలింది. ఐసీసీ టోర్నీల్లో వన్డే ప్రపంచకప్‌ అత్యుత్తమైందిగా భావిస్తున్నామని 54 శాతం మంది చెప్పడం విశేషం.