రుతురాజ్‌ మరో సెంచరీ

ఫైనల్లో మహారాష్ట్ర

అహ్మదాబాద్‌: రుతురాజ్‌ గైక్వాడ్‌ జోరు మామూలుగా లేదు. గత మ్యాచ్‌లో ఒకే ఓవర్లో 7 సిక్సర్లతో సహా అజేయ డబుల్‌ సెంచరీతో అదరగొట్టిన రుతురాజ్‌.. మరోసారి శతకం (168; 126 బంతుల్లో 18×4, 6×6) బాదడంతో విజయ్‌హజారె ట్రోఫీలో మహారాష్ట్ర ఫైనల్‌కు దూసుకెళ్లింది. బుధవారం సెమీస్‌లో ఆ జట్టు 12 పరుగుల తేడాతో అస్సాంను ఓడించింది. మొదట రుతురాజ్‌, అంకిత్‌ (110; 89 బంతుల్లో 10×4, 2×6) సెంచరీలు సాధించడంతో మహారాష్ట్ర 7 వికెట్లకు 350 పరుగులు చేసింది. ఛేదనలో అస్సాం 8 వికెట్లకు 338 చేసి త్రుటిలో ఓడింది. మరో సెమీస్‌లో ఉనద్కత్‌ (4/26) విజృంభించడంతో సౌరాష్ట్ర 5 వికెట్ల తేడాతో కర్ణాటకను ఓడించింది. మొదట కర్ణాటక 171 పరుగులకే ఆలౌట్‌ కాగా.. సౌరాష్ట్ర 36.2 ఓవర్లలో 5 వికెట్లు కోల్పోయి లక్ష్యాన్ని ఛేదించింది.