‘లక్ష్య’ అథ్లెట్లు అదుర్స్‌

ఈనాడు, హైదరాబాద్‌: ఈనాడు సీఎస్‌ఆర్‌ కార్యక్రమం ‘లక్ష్య’ క్రీడాకారులు తెలంగాణ రాష్ట్ర సబ్‌ జూనియర్‌ అథ్లెటిక్స్‌ ఛాంపియన్‌షిప్‌లో అదరగొట్టారు. మొదటి రోజు 18 పతకాలతో మెరిసిన ‘లక్ష్య’ అథ్లెట్లు మంగళవారం మరో 17 పతకాలు సాధించారు. గచ్చిబౌలీ స్టేడియంలో ముగిసిన పోటీల్లో 3 స్వర్ణ, 5 రజత, 9 కాంస్య పతకాలతో సత్తాచాటారు. మంచిర్యాలకు చెందిన రిషిత్‌ (అండర్‌-12 బాలురు, 600 మీటర్లు) రజతం, సాయి రఘువర్దన్‌ (అండర్‌-12 బాలురు, 600 మీ) కాంస్యం, సాయి కిరణ్‌ (అండర్‌-10 బాలురు, 300 మీ) స్వర్ణం, సృష్టి యోగ్యత (అండర్‌-10 బాలికలు, 300 మీ) స్వర్ణ పతకాలు సాధించారు. సిద్దిపేట ఆటగాడు కొండల్‌ అండర్‌-10 బాలురలో లాంగ్‌జంప్‌లో స్వర్ణం, 300 మీ పరుగులో కాంస్య పతకాలు గెలుచుకున్నాడు. రజినీకాంత్‌ (అండర్‌-10 బాలురు, లాంగ్‌జంప్‌) కాంస్యం, నందు (అండర్‌-14 బాలురు, హైజంప్‌) రజతం సాధించారు. నల్గొండకు చెందిన సహస్ర శెట్టి (అండర్‌-14 బాలికలు, 600 మీ) కాంస్యం, షేక్‌ సయ్యద్‌ (అండర్‌-12 బాలురు, 400 మీ) కాంస్యం, అంజలి (అండర్‌-14 బాలికలు, లాంగ్‌జంప్‌) కాంస్యం, ఆయేషా (అండర్‌-14 బాలికలు, హైజంప్‌) రజతం పతకాలు గెలుచుకున్నారు. అండర్‌-8 బాలురలో సాయి రుత్విక్‌ 50 మీ పరుగులో రజతం, స్టాండింగ్‌ బ్రాడ్‌ జంప్‌లో కాంస్య పతకాలు నెగ్గాడు. వరంగల్‌ అమ్మాయి పౌర్ణమి (అండర్‌-12 బాలికలు, లాంగ్‌జంప్‌) రజతం సాధించింది. నారాయణపేట ఆటగాడు బసంత్‌ (అండర్‌-14 బాలురు, 600 మీ) కాంస్యం; భద్రాద్రి కొత్తగూడేనికి చెందిన షేక్‌ అమ్రీన్‌ (అండర్‌-14 బాలికలు, షాట్‌పుట్‌) కాంస్య పతకాలు దక్కించుకున్నారు.