ప్రణయ్‌కు చుక్కెదురు

బ్యాంకాక్‌: బీడబ్ల్యూఎఫ్‌ ప్రపంచ టూర్‌ ఫైనల్స్‌లో భారత అగ్రశ్రేణి ఆటగాడు హెచ్‌.ఎస్‌.ప్రణయ్‌కు చుక్కెదురైంది. పురుషుల సింగిల్స్‌ గ్రూపు-ఎ తొలి మ్యాచ్‌లో ప్రణయ్‌ పరాజయం చవిచూశాడు. బుధవారం జరిగిన మ్యాచ్‌లో మూడో సీడ్‌ ప్రణయ్‌ 12-21, 21-9, 17-21తో కొడాయ్‌ నరవొక (జపాన్‌) చేతిలో ఓటమి పాలయ్యాడు. 60 నిమిషాల పాటు హోరాహోరీగా సాగిన పోరులో తొలి గేమ్‌ను చేజార్చుకున్న ప్రణయ్‌.. అనంతరం అద్భుతంగా పుంజుకున్నాడు. రెండో గేమ్‌ను ఏకపక్షంగా ముగించిన ప్రణయ్‌ మూడో గేమ్‌లో తడబడ్డాడు. నిర్ణయాత్మక మూడో గేమ్‌లో 15-15తో పాయింట్లు సమంగా ఉన్న సమయంలో అనవసర తప్పిదాలు ప్రణయ్‌ కొంపముంచాయి. మూడు అనవసర తప్పిదాలతో ప్రణయ్‌ మ్యాచ్‌ను చేజార్చుకున్నాడు. గురువారం జరిగే గ్రూపు-ఎ రెండో మ్యాచ్‌లో గ్వాంగ్‌ జు (చైనా)తో ప్రణయ్‌ తలపడతాడు.