IND vs NZ: అతడితో కలిసి బౌలింగ్‌ చేయడం గొప్ప అనుభూతి: జయంత్‌ యాదవ్‌

ఇంటర్నెట్ డెస్క్‌: టీమ్‌ఇండియా సీనియర్‌ స్పిన్నర్‌ రవిచంద్రన్‌ అశ్విన్‌తో కలిసి బౌలింగ్‌ చేయడం గొప్ప అనుభూతి అని యువ ఆటగాడు జయంత్‌ యాదవ్‌ అన్నాడు. అతడితో కలిసి బౌలింగ్ చేయడం వల్ల చాలా విషయాలు నేర్చుకున్నానని పేర్కొన్నాడు. న్యూజిలాండ్‌తో జరిగిన రెండో టెస్టులో జయంత్ యాదవ్‌ ఐదు వికెట్లు తీసి ఆకట్టుకున్న విషయం తెలిసిందే.

‘సీనియర్‌ స్పిన్నర్‌ అశ్విన్‌తో కలిసి బౌలింగ్‌ చేయడం మరిచిపోలేని అనుభూతి. జట్టు విజయం గురించి అతడు చాలా ఆలోచిస్తాడు. ఇలాంటి వారితో బంతిని పంచుకుంటే.. అది మన ఎదుగుదలకు చాలా ఉపయోగపడుతుంది. అతడి నుంచి చాలా విషయాలు నేర్చుకున్నాను. మూడోరోజు చివరి సెషన్‌లో వికెట్లు తీసేందుకు ఇబ్బంది పడిన నేను.. నాలుగో రోజు ఉదయం మెరుగైన ప్రదర్శన చేశాను. పిచ్‌ కూడా పూర్తిగా మారిపోయి స్పిన్‌కు అనుకూలంగా మారింది. వాంఖడే మైదానం నాకు చాలా ప్రత్యేకమైనది. నేను చివరి సారిగా ఇక్కడ ఆడిన టెస్టులో శతకం బాదాను. టీమ్‌ఇండియా సాధించిన ఘన విజయంలో భాగమైనందుకు సంతోషంగా ఉంది’ అని జయంత్‌ యాదవ్‌ అన్నాడు. నాలుగో రోజు న్యూజిలాండ్ రెండో ఇన్నింగ్స్‌ను త్వరగా ముగించడంలో జయంత్ యాదవ్‌ కీలకంగా వ్యవహరించిన సంగతి తెలిసిందే. రెండో ఇన్నింగ్స్‌లో 4/49 తో తన కెరీర్లోనే అత్యుత్తమ ప్రదర్శన చేశాడు.

► Read latest Sports News and Telugu News