GGW vs RCBW: డంక్లీ దంచెన్‌.. హర్లీన్ అదరగొట్టెన్‌.. ఆర్సీబీ ముందు భారీ టార్గెట్‌

ముంబయి: మహిళల ప్రీమియర్ లీగ్‌లో భాగంగా గుజరాత్ జెయింట్స్‌ (GGW), రాయల్‌ ఛాలెంజర్స్‌ బెంగళూరు (RCBW)జట్ల మధ్య మ్యాచ్‌ జరుగుతోంది. టాస్‌ గెలిచి తొలుత బ్యాటింగ్‌ చేసిన గుజరాత్ నిర్ణీత 20 ఓవర్లలో 7 వికెట్ల నష్టానికి 201 పరుగులు చేసింది. ఓపెనర్‌ సబ్బినేని మేఘన (8) నిరాశపరిచినా.. మరో ఓపెనర్‌ సోఫియా డంక్లీ (65; 28 బంతుల్లో 11 ఫోర్లు, 3 సిక్స్‌లు) క్రీజులో ఉన్నంత సేపు బౌండరీలతో విధ్వంసం సృష్టించింది. హర్లీన్‌ డియోల్‌ (67; 45 బంతుల్లో 9 ఫోర్లు, 1 సిక్స్‌) కూడా దూకుడుగా ఆడింది. ఆష్లీన్‌ గార్డ్‌నర్‌ (14), హేమలత (16), సథర్లాండ్ (14), స్నేహ్‌ రాణా (2), కీమ్ గార్త్ (3*), సుష్మా వర్మ (5*) పరుగులు చేశారు. ఆర్సీబీ బౌలర్లలో శ్రేయాంక పాటిల్, హీథర్‌ తలో రెండు వికెట్లు పడగొట్టగా.. మేఘన్‌ స్కట్, రేణుకా తలో వికెట్ తీశారు. 

డంక్లీ దంచెన్‌.. హర్లీన్ హరికేన్ !

గుజరాత్‌ ఇన్నింగ్స్ నెమ్మదిగా ప్రారంభమైంది. మొదటి ఓవర్‌లో ఒక్క పరుగు కూడా రాలేదు. ఎల్లీస్ పెర్రీ వేసిన రెండో ఓవర్‌లో డంక్లీ, మేఘన చెరో ఫోర్ బాదారు. మేఘన్‌ స్కట్ వేసిన మూడో ఓవర్‌లో సోఫియా రెండు ఫోర్లు బాదింది. ఇదే ఓవర్లో మేఘన ఓ బౌండరీ కొట్టి చివరి బంతికి రీచాఘోష్‌కి క్యాచ్‌ ఇచ్చి వెనుదిరిగింది. మేఘన ఔటైన తర్వాత సోఫియా డంక్లీ దూకుడు పెంచింది. రేణుకా సింగ్ వేసిన నాలుగో ఓవర్లో రెండు ఫోర్లు, ఓ సిక్స్‌ బాదింది. ప్రీతి వేసిన తర్వాతి ఓవర్లో సోఫియా బౌండరీల మోత మోగించింది. వరుసగా 4,6,4,4,4 కొట్టి 18 బంతుల్లోనే అర్ధ శతకం పూర్తి చేసుకుంది. శ్రేయాంక పాటిల్ వేసిన ఎనిమిదో ఓవర్లో సిక్సర్‌, ఫోర్‌ బాది చివరి బంతికి హీథర్‌ నైట్‌కు క్యాచ్‌ ఇచ్చి వెనుదిరిగింది. గార్డ్‌నర్‌ను హీథర్ నైట్‌ వెనక్కి పంపిన తర్వాత క్రీజులోకి వచ్చిన హేమలత దూకుడుగా ఆడింది. ప్రీతి వేసిన 15 ఓవర్లో రెండు ఫోర్లు, ఓ సిక్స్‌ కొట్టింది. కానీ, తర్వాతి ఓవర్‌లోనే రేణుకా సింగ్‌కు చిక్కి పెవిలియన్‌ చేరింది. పెర్రీ వేసిన 17 ఓవర్లో హర్లీన్‌ డియోల్ వరుసగా మూడు ఫోర్లు బాదింది. ఈ క్రమంలోనే అర్ధ శతకాన్ని పూర్తి చేసుకుంది. రేణుకా సింగ్ వేసిన 19 ఓవర్‌లో మొదటి బంతికి సథర్లాండ్, చివరి బంతికి స్నేహ్‌ రాణా ఔటయ్యారు. శ్రేయాంక వేసిన చివరి ఓవర్లో నాలుగో బంతికి డియోల్ పెవిలియన్‌ చేరింది.