Hardik Pandya: ధోనీ ఇచ్చిన ఆ సలహా వల్లే బాగా ఆడుతున్నా: హార్దిక్‌ పాండ్య

ఇంటర్నెట్ డెస్క్: భారత జట్టులో విధ్వంసకర బ్యాటింగ్‌, తెలివైన బౌలింగ్‌తో మంచి ఆల్‌రౌండర్‌ అనిపించుకున్న హార్దిక్‌ పాండ్య.... ఉన్నట్టుండి ఫామ్‌, ఫిట్‌నెస్‌ సమస్యలతో టీమ్‌ఇండియాకు దూరమయ్యాడు. ఇక అతడి పనైపోయినట్లే అని అంతా భావించారు. ఇదంతా రెండున్నర నెలలకు ముందు కథ. ఇప్పుడు హార్దిక్ బ్యాటింగ్‌లో అదరగొడుతూ మునుపటి ఫామ్‌ని అందుకున్నాడు. ఇటీవల ముగిసిన భారత టీ20 లీగ్‌లో గుజరాత్‌కు సారథ్యం వహించిన అతడు జట్టుని ఛాంపియన్‌గా నిలిపాడు. 15మ్యాచ్‌ల్లో  487 పరుగులు చేసి బ్యాటర్‌గానూ ఆకట్టుకున్నాడు. దక్షిణాఫ్రికాతో జరుగుతున్న టీ20 సిరీస్‌లో చోటు దక్కించుకున్నాడు. 4 మ్యాచ్‌ల్లో 153.94 స్ట్రైక్‌రేట్‌తో  117 పరుగులు సాధించి భారత్‌ విజయాల్లో కీలకపాత్ర పోషించాడు.

ఐర్లాండ్‌ సిరీస్‌కు సారథిగా ఎంపికై టీమ్‌ఇండియా భవిష్యత్‌ కెప్టెన్‌ రేసులో నిలిచాడు. ఈ క్రమంలో  పాండ్య తాను నిలకడగా రాణిస్తూ.. స్వేచ్ఛగా షాట్లు ఆడడానికి గల కారణాన్ని వివరించాడు. ‘మహీ భాయ్ (ధోనీ) నాకు ఒక విషయం నేర్పాడు. నేను అతన్ని ‘ఒత్తిడిని ఎలా అధిగమిస్తావు’? అని అడిగా.  దీనికి ధోనీ ... నువ్వు బ్యాటింగ్‌ చేసేటప్పుడు  ‘నీ వ్యక్తిగత స్కోరు గురించి ఆలోచించడం మానేసి జట్టు అవసరాలకు తగ్గట్లు ఆడటంపై దృష్టి పెట్టు’ అని సలహా ఇచ్చాడు. ఈ సూచన నేను మెరుగైన ఆటగాడిగా మారేందుకు ఉపయోగపడింది’ అని హార్దిక్‌ వెల్లడించాడు.