Siraj: వన్డే ప్రపంచకప్‌లో సిరాజ్‌ ఆడతాడని ఆశిస్తున్నా: సిరాజ్‌ తల్లి

ఇంటర్నెట్‌ డెస్క్‌: సొంత గడ్డపై తన కుమారుడి అద్భుతమైన ప్రదర్శనను తిలకించిన సిరాజ్‌ తల్లి అతడు వన్డే ప్రపంచకప్‌లో ఆడాలని కోరుకున్నారు. హైదరాబాద్‌లోని ఉప్పల్‌ వేదికగా న్యూజిలాండ్‌తో జరిగిన తొలి వన్డేలో భారత పేసర్‌ మహమ్మద్‌ సిరాజ్‌ అద్భుతమైన ప్రదర్శన చేశాడు. ఆ మ్యాచ్‌ అతడికి ఎంతో ప్రత్యేకమైంది. సొంతమైదానంలో సూపర్ బౌలింగ్‌తో కివీస్‌ను ఓడించడంలో కీలక పాత్ర పోషించాడు. ఈ సందర్భంగా సిరాజ్‌ కుటుంబసభ్యులు మాట్లాడిన వీడియోను బీసీసీఐ విడుదల చేసింది. ‘‘దేశం గర్వించేలా నా కుమారుడు ఎదుగుతాడని ఆశిస్తున్నా. సిరాజ్‌ తన అద్బుతమైన ప్రదర్శనలతో ఆటలో ముందుకు సాగాలి. వన్డే ప్రపంచకప్‌లో సిరాజ్‌ ఆడతాడని ఆశిస్తున్నా’’ అని సిరాజ్‌ తల్లి తెలిపారు.

ఉప్పల్‌ మైదానంలో సిరాజ్‌ 46 పరుగులిచ్చి 4 వికెట్లు పడగొట్టాడు. ఈ సందర్భంగా సిరాజ్‌ మాట్లాడుతూ స్వస్థలంలో ఆడటం తనకెంతో ధైర్యాన్ని ఇస్తుందని తెలిపాడు.‘‘సొంత గడ్డపై ఇదే నా మొదటి అంతర్జాతీయ మ్యాచ్‌. ఇదివరకు ఇక్కడ ఐపీఎల్‌ మాత్రమే ఆడాను. కుటుంబ సభ్యులు, స్నేహితులు అందరూ మ్యాచ్‌ చూడటానికి వస్తారు. అందువల్ల స్వస్థలంలో ఆడుతుంటే ఎంతో ధైర్యంగా ఉంటుంది’’ అని సిరాజ్‌ తెలిపాడు.జస్ప్రీత్‌ బుమ్రా గైర్హాజరీతో జట్టులో సిరాజ్‌ తన స్థానాన్ని పదిలం చేసుకున్నాడు‌. ఇక భారత్, న్యూజిలాండ్‌ జట్ల మధ్య రెండో వన్డే జనవరి 21న రాయ్‌పుర్‌లో జరగనుంది.