Sarfaraz Khan : ఆడితే ముంబయి జట్టుకే.. లేకపోతే వీడ్కోలు చెబుతా!: సర్ఫరాజ్‌ ఖాన్‌

ఇంటర్నెట్‌ డెస్క్: ముంబయిపై మధ్యప్రదేశ్‌ ఫైనల్‌లో విజయం సాధించి తొలిసారి రంజీ ట్రోఫీని కైవసం చేసుకున్న విషయం తెలిసిందే. అయితే టోర్నీ ఆసాంతం రాణించిన ముంబయి బ్యాటర్ సర్ఫరాజ్‌ ఖాన్‌ ‘ప్లేయర్‌ ఆఫ్‌ ది టోర్నమెంట్‌’గా ఎంపికయ్యాడు. 122.75 సగటుతో 982 పరుగులు సాధించాడు. ఇందులో నాలుగు శతకాలు,  రెండు హాఫ్ సెంచరీలు ఉన్నాయి. అత్యుత్తమ వ్యక్తిగత స్కోరు 275 పరుగులు. ఈ క్రమంలో రంజీ ట్రోఫీ మ్యాచ్‌లకు సంబంధించి సర్ఫరాజ్‌ ఖాన్‌ ఓ క్రీడా ఛానల్‌తో మాట్లాడుతూ కాస్త భావోద్వేగానికి గురయ్యాడు. ఒకానొక సమయంలో ఆడితే ముంబయి జట్టు తరఫునే క్రికెట్ ఆడాలని.. లేకపోతే ఆటకే వీడ్కోలు పలకాలని భావించినట్లు పేర్కొన్నాడు. తొలుత ముంబయికే ప్రాతినిధ్యం వహించిన సర్ఫరాజ్‌ 2015-18 వరకు ఉత్తర్‌ప్రదేశ్‌కు వెళ్లిపోయాడు. అయితే మళ్లీ 2020 సీజన్‌ నాటికి ముంబయి టీమ్‌లోకి వచ్చేశాడు. ఇక అప్పటి నుంచి వెనుదిరిగే చూసే అవకాశం రాలేదు. 

‘‘రంజీ ట్రోఫీలో శతకం చేసినప్పుడు నేను భావోద్వేగానికి గురయ్యా. నేను గతంలో ముంబయి నుంచి ఉత్తర్‌ప్రదేశ్‌ తరఫున ఆడేందుకు వెళ్లేటప్పుడు ముంబయి జెర్సీని పక్కన పెట్టాల్సి వచ్చింది. అప్పుడు ఎంతో ఏడ్చాను. ఎందుకంటే ముంబయి జెర్సీని ధరించి సెంచరీ చేయాలనేది నా కోరిక. పేపర్‌లో నా ఫొటో కనిపించాలని ఆశగా ఉండేది. కానీ అప్పుడు అది నెరవేరేదిగా అనిపించలేదు’’ అని సర్ఫరాజ్‌ వివరించాడు. అయితే రెండేళ్లకే ఉత్తర్‌ ప్రదేశ్‌ టీమ్‌ నుంచి ముంబయి జట్టుకు మారిపోయాడు. 

‘‘ఒకసారి మా నాన్నతో ఓ మాట అన్నాను. ముంబయి జట్టు తరఫున క్రికెట్ ఆడకపోతే.. ఆటకే వీడ్కోలు పలుకుతా అని చెప్పా. ఉత్తర్‌ప్రదేశ్‌ టీమ్‌ నుంచి బయటకు వచ్చాక ఓ సంవత్సరం పాటు ప్రశాంతంగా ఉండేందుకు ప్రయత్నించా. ఆ సమయంలో క్లబ్‌ క్రికెట్ మాత్రమే ఆడా. నా జీవితంలో కష్టంగా గడిపిన సమయమదే. ఆ తర్వాత ముంబయి జట్టులోకి పునరాగమనం చేశా. 2020లో ఉత్తర్‌ప్రదేశ్‌పైనే ట్రిపుల్‌ సెంచరీ సాధించా. రంజీ ట్రోఫీ ఫైనల్‌లో ముంబయి తరఫున సెంచరీ బాదాలనేది నా కోరిక. అది తీరిపోయింది. మిగతా మ్యాచుల్లో శతకాలు బాదినా.. ఫైనల్‌లో కొడితే ఎంతో ప్రత్యేకం’’ అని సర్ఫరాజ్‌ పేర్కొన్నాడు.