Dinesh Karthik: సిరాజ్‌కి వన్డే ప్రపంచకప్‌లో చోటు పక్కా.. టెస్టుల్లో 300 వికెట్లు పడగొడ్తాడు: డీకే

ఇంటర్నెట్ డెస్క్:  టీమ్‌ఇండియా ఫాస్ట్‌బౌలర్‌ మహమ్మద్‌ సిరాజ్‌ (Mohammed Siraj) 2022లో బంతితో అద్భుతమైన ప్రదర్శన కనబర్చాడు. ఈ ఏడాది జనవరిలో న్యూజిలాండ్‌తో జరిగిన వన్డే సిరీస్‌లోనూ రాణించాడు. ఇటీవల ఐసీసీ వన్డే ర్యాంకింగ్స్‌లో నంబర్‌వన్‌ బౌలర్‌గా అవతరించాడు. ఈ నేపథ్యంలో సిరాజ్‌పై భారత వెటరన్‌ వికెట్‌కీపర్‌ దినేశ్‌ కార్తిక్‌ (Dinesh Karthik) ప్రశంసలు కురిపించాడు. ఈ ఏడాది భారత్‌లో జరిగే వన్డే ప్రపంచకప్‌నకు సిరాజ్‌ తప్పకుండా ఎంపికవుతాడని దినేశ్‌ కార్తిక్‌ ధీమా వ్యక్తం చేశాడు. సిరాజ్‌ తన ఫిట్‌నెస్‌ను కాపాడుకోగలిగితే టెస్టు క్రికెట్‌లో భారతదేశపు అత్యుత్తమ ఫాస్ట్ బౌలర్‌లలో ఒకడిగా మారగలడని కార్తీక్ పేర్కొన్నాడు.

‘అతడు (సిరాజ్‌) 2023 వన్డే ప్రపంచకప్‌ జట్టులో భాగమవుతాడని నేను చాలా కచ్చితంగా చెప్తున్నా. అతడు ఆ స్థానానికి అర్హుడు. చాలా బాగా ఆడాడు. 2022 ఐపీఎల్‌లో రాణించలేదు. వైఫల్యాలను ఎలా ఎదుర్కొవాలనే విషయాలను అప్పుడు నేర్చుకున్నాడు.  ఆ వైఫల్యం సిరాజ్‌ని మంచి స్థితికి చేర్చింది. గాయాల బారినపడకుండా జాగ్రత్తగా ఉండాలి. సదీర్ఘ పార్మాట్‌లో బాగా రాణిస్తున్నాడు. ఫిట్‌గా ఉంటే భారతదేశపు అత్యుత్తమ ఫాస్ట్ బౌలర్‌లలో ఒకడిగా మారతాడు. టెస్టు క్రికెట్‌లో కనీసం 300 వికెట్లు పడగొట్టడం నేను చూస్తా. పరిమిత ఓవర్ల క్రికెట్‌లో సిరాజ్‌ ఇంకా చాలా విషయాలు నేర్చుకోవాల్సింది’ అని దినేశ్ కార్తిక్‌ వివరించాడు.