తొలిసారిగా భారత్‌తో భారత్‌-ఏ టెస్టు మ్యాచు

లండన్‌: గతంలో ఎన్నడూ లేని విధంగా ఇంగ్లాండ్‌ పర్యటనలో భారత్‌, భారత్‌-ఏ నాలుగు రోజుల సన్నాహక టెస్టులో తలపడనున్నాయి. ఈ ఏడాది జులైలో జరిగే ఈ పోరుకు నార్తాంప్టన్‌షైర్‌ కౌంటీ మైదానం వేదిక కానుంది. తేదీలు మాత్రం ఇంకా నిర్ణయించలేదు. సాధారణంగా ఏదైనా జట్టు విదేశాల్లో పర్యటిస్తే అక్కడి ‘ఏ’ జట్టుతో సాధన మ్యాచుల్లో పోటీపడుతుంది. తీరిక లేని షెడ్యూలు, బయో బుడగ వల్ల ఈ సారి భారత్‌తో భారత్‌-ఏ తలపడుతుండటం గమనార్హం.

ఐదు టెస్టుల సిరీసు కోసం టీమ్‌ఇండియా ఆగస్టు, సెప్టెంబర్లో ఇంగ్లాండ్‌లో పర్యటించనుంది. తొలిటెస్టు ఆగస్టు 4న నాటింగ్‌హామ్‌లో మొదలవుతుంది. ‘భారత్‌, భారత్‌-ఏకు మేం స్వాగతం పలుకుతున్నాం. ప్రపంచంలోని అత్యుత్తమ అంతర్జాతీయ క్రికెటర్లు ఈ వేసవిలో కౌంటీ గ్రౌండ్‌లో తలపడనున్నారు’ అని నార్తాంప్టన్‌ షైర్‌ కౌంటీ క్రికెట్‌ క్లబ్‌ తెలిపింది.

‘ఆగస్టులో ఇంగ్లాండ్‌తో ఐదు టెస్టుల సిరీసుకు ముందు విరాట్‌ కోహ్లీ సారథ్యంలోని టీమ్‌ఇండియా నాలుగు రోజుల సన్నాహక టెస్టులో భారత్‌-ఏతో తలపడనుంది. జులై 28న రెండో వార్మప్‌ మ్యాచ్‌ కోసం భారత బృందం అక్కడి నుంచి లీసెస్టర్‌షైర్‌కు చేరుకుంటుంది’ అని కౌంటీ క్లబ్‌ వెల్లడించింది.

నాటింగ్‌హామ్‌ వేదికగా భారత్‌, ఇంగ్లాండ్‌ మధ్య ఆగస్టు 4-8 వరకు తొలి టెస్టు జరగనుంది. ఇక రెండు (ఆగస్టు 12-16), నాలుగో టెస్టు (సెప్టెంబర్‌ 2-6)లకు వేదిక లండన్‌. మూడో (ఆగస్టు 25-29) టెస్టు లీడ్స్‌, ఐదో టెస్టు (సెప్టెంబర్‌ 10-14)కు మాంచెస్టర్లో జరుగుతాయి.‌ ప్రస్తుతం ఇంగ్లాండ్‌.. భారత్‌లో పర్యటిస్తోన్న సంగతి తెలిసిందే. ఆతిథ్య జట్టుతో నాలుగు టెస్టులు, ఐదు టీ20లు, మూడు వన్డేల్లో తలపడనుంది.

ఇవీ చదవండి
బౌలర్లు బౌండరీలు ఇస్తే.. శాస్త్రి అరిచేస్తాడు
థాంక్యూ.. టీమ్‌ఇండియా అంటున్న లైయన్‌