IND vs SA : బౌలర్లు చెలరేగాలి.!

ఇంటర్నెట్ డెస్క్‌:  వాండరర్స్ వేదికగా జరుగుతున్న రెండో టెస్టు తొలి రోజు ఆట ముగిసే సరికి దక్షిణాఫ్రికా 35/1 స్కోరుతో నిలిచింది. సఫారీలకు తొలి ఇన్నింగ్స్‌ ప్రారంభించిన కొద్ది సేపటికే షాక్‌ తగిలింది. మహమ్మద్ షమి వేసిన నాలుగో ఓవర్లో ఓపెనర్‌ మార్‌క్రమ్‌ (7) ఎల్బీడబ్ల్యూగా వెనుదిరిగాడు. ఆ తర్వాత క్రీజులోకి వచ్చిన కీగన్ పీటర్సన్‌ (14)తో కలిసి డీన్‌ ఎల్గర్‌ (11) మరో వికెట్ పడకుండా జాగ్రత్తగా ఆడారు. భారత బౌలర్లలో మహమ్మద్‌ షమి ఒక వికెట్‌ పడగొట్టాడు. రెండో రోజు బౌలర్లు చెలరేగాల్సిన అవసరం ఉంది. దక్షిణాఫ్రికా ఇంకా 167 పరుగులు వెనుకబడి ఉంది.

అంతకు ముందు, టాస్ గెలిచి బ్యాటింగ్‌ ఎంచుకున్న భారత్‌.. తొలి ఇన్నింగ్స్‌లో 63.1 ఓవర్లలో 202 పరుగులకు ఆలౌట్ అయ్యింది. రెగ్యులర్‌ కెప్టెన్‌ విరాట్‌ కోహ్లీ వెన్ను నొప్పి కారణంగా రెండో టెస్టుకు దూరమయ్యాడు. అతడి స్థానంలో నాయకత్వ బాధ్యతలు చేపట్టిన ఓపెనర్‌ కేఎల్ రాహుల్ (50: 133 బంతుల్లో 9×4) అర్ధ శతకంతో రాణించాడు. సీనియర్‌ స్పిన్నర్‌ రవిచంద్రన్‌ అశ్విన్‌ (46: 50 బంతుల్లో 6×4) అర్ధ శతకం చేజారినా.. కీలక ఇన్నింగ్స్‌ ఆడాడు. మరో ఓపెనర్‌ మయాంక్‌ అగర్వాల్ (26), హనుమ విహారి (20), రిషభ్‌ పంత్‌ (17), మహమ్మద్‌ షమి (9), ఛెతేశ్వర్‌ పుజారా (3), మహమ్మద్ సిరాజ్‌ (1) పరుగులు చేశారు. అజింక్య రహానె (0), శార్దూల్ ఠాకూర్ (0) డకౌట్‌ అయ్యారు. జస్ప్రీత్‌ బుమ్రా (14) నాటౌట్‌గా నిలిచాడు. దక్షిణాఫ్రికా బౌలర్లలో మార్కో జాన్సన్‌ నాలుగు,  ఒలివర్‌ మూడు, కగిసో రబాడ మూడు వికెట్లు పడగొట్టారు.

► Read latest Sports News and Telugu News