IND vs SA: ఆ రికార్డుకు చేరువలో ఇషాన్‌ కిషన్‌.. ఇంతకీ అది ఏంటంటే?

ఇంటర్నెట్ డెస్క్: రాజ్‌కోట్‌ వేదికగా శుక్రవారం రాత్రి భారత్‌, దక్షిణాఫ్రికా మధ్య నాలుగో టీ20 మ్యాచ్‌ జరగనుంది. ఈ ఐదు టీ20 మ్యాచ్‌ల సిరీస్‌లో దక్షిణాఫ్రికా 2-1 ఆధిక్యంలో ఉంది. దీంట్లో భారత్‌ గెలిస్తే సిరీస్ సమం అవుతుంది. ఒకవేళ టీమ్‌ఇండియా ఓటమిపాలైతే ఒక మ్యాచ్‌ మిగిలుండగానే సిరీస్ సౌతాఫ్రికా వశం అవుతుంది. ఈ కీలకమైన పోరులో మరోసారి సత్తా చాటాలని యువ భారత్ భావిస్తోంది. ఇదిలా ఉండగా, సూఫర్‌ ఫామ్‌లో ఉన్న భారత ఓపెనర్‌ ఇషాన్‌ కిషన్‌కు ఓ రికార్డు నెలకొల్పేందుకు నాలుగో టీ20 రూపంలో చక్కటి అవకాశం లభించింది. కిషన్‌ మరో 47 పరుగులు చేస్తే అంతర్జాతీయ టీ20ల్లో అత్యంత వేగంగా 500కు పైగా పరుగులు చేసిన రెండో భారత క్రికెటర్‌గా రికార్డు సృష్టిస్తాడు.  గాయం కారణంగా ఈ సిరీస్‌కు దూరమైన కేఎల్‌ రాహుల్  13 ఇన్నింగ్స్‌ల్లో 500 పరుగులు పూర్తి చేసి ఈ జాబితాలో అగ్రస్థానంలో ఉన్నాడు.

ఇషాన్‌ కిషన్ ఇప్పటివరకు 13 టీ20 మ్యాచ్‌ల్లో 37.75 సగటుతో 453 పరుగులు చేశాడు. ఇందులో నాలుగు అర్ధ సెంచరీలున్నాయి. అందులో రెండు ఈ సిరీస్‌లో బాదినవే. తొలి టీ20లో ఇషాన్‌ (76; 48 బంతుల్లో) దంచికొట్టగా.. రెండో టీ20లో 34 పరుగులు చేసి ఫర్వాలేదనిపించాడు. వైజాగ్ వేదికగా జరిగిన మూడో టీ20లో 35 బంతుల్లో 5 ఫోర్లు, 2 సిక్స్‌ల సాయంతో 54 పరుగులు చేశాడు.