Cheteshwar Pujara: నా కెరీర్‌లో అత్యుత్తమ సిరీస్‌ అదే: ఛెతేశ్వర్ పుజారా

ఇంటర్నెట్ డెస్క్:  2018-19 ఆస్ట్రేలియా పర్యటన (బోర్డర్‌-గావస్కర్ ట్రోఫీ) తన కెరీర్‌లో అత్యంత సవాలుతో కూడిన, అత్యుత్తమ సిరీస్ అని భారత టాప్‌ ఆర్డర్ బ్యాటర్ ఛెతేశ్వర్ పుజారా అన్నాడు. భారత టాప్‌ ఆర్డర్‌లో కీలక బ్యాటర్‌గా ఉన్న పుజారా ఆస్ట్రేలియాలో జరిగిన 2018-19 మధ్య జరిగిన బోర్డర్‌-గావస్కర్‌ ట్రోఫీలో అద్భుతమైన ఆటతీరు కనబరిచాడు. మొత్తం 521 పరుగులు చేసి నాలుగు టెస్టుల సిరీస్‌ని భారత్ 2-1 తేడాతో కైవసం చేసుకోవడంలో కీలకపాత్ర పోషించాడు.   

‘నేను కొన్ని మంచి సిరీస్‌లను ఆస్వాదించాను. కానీ, నా క్రికెట్ కెరీర్‌లో 2018-19 బోర్డర్‌- గావస్కర్‌ ట్రోఫీ అత్యుత్తమ సిరీస్. అప్పుడు నేను బ్యాటింగ్ చేసిన విధానం, ఏకాగ్రత బాగుంది. ఆ సిరీస్‌లో శారీరకంగా, మానసికంగా చాలా ఒత్తిడి ఉండేది. ప్రతి మ్యాచ్‌ ఒక సవాలుగా ఉండేది’ అని పుజారా పేర్కొన్నాడు. ఆస్ట్రేలియా ప్రస్తుతం అన్ని పరిస్థితుల్లో బాగా ఆడుతోంది. మరికొన్ని రోజుల్లో ఆసీస్, భారత్ మధ్య బోర్డర్-గావస్కర్‌ ట్రోఫీ ప్రారంభంకానుంది. ఈ నేపథ్యంలో పుజారా  మాట్లాడుతూ.. రెండు జట్ల మధ్య తీవ్రమైన పోటీ ఉందని, ఇలా రసవత్తర పోరు ఉండటం తనకి ఇష్టమని పేర్కొన్నాడు. 

‘ఆస్ట్రేలియాతో మంచి పోటీ ఉంటుంది. వారు మాకు సవాలు విసురుతారు. ఇలాంటి రసవత్తరపోరు నేను ఇష్టపడతాను. ఇది కేవలం మాటల యుద్ధం కాదు, క్రికెట్ యుద్ధం. ఆస్ట్రేలియా పోరాడే జట్టు. టీమ్‌ ఎప్పుడైనా క్లిష్ట పరిస్థితుల్లో ఉంటే ఆటగాడిగా జట్టును ఆదుకోవాల్సిన బాధ్యత మనపై ఉంటుంది. నేను ఎన్నో ముఖ్యమైన ఇన్నింగ్స్‌లు ఆడాను. వాటిలో చాలా వరకు ఆస్ట్రేలియాపై సాధించినవే’ అని పుజారా వివరించాడు.