INDw vs NZw : 0-3తో సిరీస్‌ కోల్పోయిన భారత మహిళల జట్టు

(Photo: BCCI Women Twitter)

ఇంటర్నెట్‌డెస్క్‌: న్యూజిలాండ్‌ పర్యటనలో ఉన్న మహిళల టీమ్‌ఇండియా జట్టు మూడో వన్డేలోనూ ఓటమిపాలైంది. దీంతో 0-3 తేడాతో 5 వన్డేల సిరీస్‌ను కోల్పోయింది. ఇప్పటికే జరిగిన ఏకైక టీ20 మ్యాచ్‌లో ఓటమిపాలైన భారత జట్టు శుక్రవారం వన్డే సిరీస్‌నూ చేజార్చుకుంది. న్యూజిలాండ్‌ ముందు 280 పరుగుల భారీ లక్ష్యాన్ని నిర్దేశించినా జట్టు విజయం సాధించలేకపోయింది. కాగా, ఈ మ్యాచ్‌లో సాధించిన 279 పరుగులు భారత మహిళల వన్డే క్రికెట్‌ చరిత్రలోనే అతిపెద్ద స్కోర్‌ కావడం గమనార్హం. అయినా, ప్రత్యర్థి జట్టు బ్యాటర్లు విరోచితంగా పోరాడి మ్యాచ్‌తో పాటు సిరీస్‌ను సొంతం చేసుకున్నారు.

ఈ మ్యాచ్‌లో టాస్‌ ఓడి బ్యాటింగ్‌కు దిగిన భారత జట్టుకు ఓపెనర్లు మేఘన (61; 41 బంతుల్లో 9x4, 2x6), షెఫాలీ వర్మ (51; 57 బంతుల్లో 7x4) శుభారంభం చేశారు. తొలి వికెట్‌కు 100 పరుగులు జోడించగా తర్వాత వచ్చిన యస్తిక భాటియా (19), కెప్టెన్‌ మిథాలి రాజ్‌ (23), హర్మన్‌ ప్రీత్ కౌర్‌ (13) విఫలమయ్యారు. అనంతరం టెయిలెండర్లతో కలిసి దీప్తి శర్మ (69 నాటౌట్‌; 69 బంతుల్లో 7x4, 1x6) విలువైన ఇన్నింగ్స్‌ ఆడింది. దీంతో భారత్‌ 49.3 ఓవర్లలో 279 పరుగులకు ఆలౌటైంది. ఇక ఛేదనలో జూలన్‌ గోస్వామి (3/47) ఆదిలోనే కివీస్‌ ఓపెనర్లు సోఫీ డివైన్‌ (0), సూజీ బేట్స్‌(5)ను పెవిలియన్‌ పంపినా తర్వాత జట్టు ఆ అవకాశాన్ని సద్వినియోగం చేసుకోలేకపోయింది. ఆపై వచ్చిన మిడిల్‌ ఆర్డర్‌ బ్యాటర్లు అమెలియా కెర్ర్‌ (67; 80 బంతుల్లో 8x4), ఆమీ సాతర్‌వైట్‌ (59; 76 బంతుల్లో 6x4), లారెన్‌ డౌన్‌ (64 నాటౌట్‌; 52 బంతుల్లో 6x4, 2x6) అర్ధశతకాలతో రాణించి ఆ జట్టును గెలిపించారు.