indw vs slw: శెభాష్‌ అమ్మాయిలు.. మిమ్మల్ని చూసి గర్విస్తున్నాం

ఇంటర్నెట్ డెస్క్‌: భారత మహిళా జట్టుపై పొగడ్తల వర్షం కురుస్తోంది. ఆసియా కప్‌లో భాగంగా శ్రీలంకతో జరిగిన చివరి మ్యాచ్‌లో భారత అమ్మాయిలు విజృంభించారు. శనివారం జరిగిన మ్యాచ్‌లో కేవలం 8.3 ఓవర్లలో లక్ష్యాన్ని ఛేదించి 8 వికెట్ల తేడాతో గెలుపొందిన విషయం తెలిసిందే. ఈ విజయంతో ఏడోసారి భారత జట్టు ఆసియా కప్‌ను కైవసం చేసుకుంది.  దీంతో మహిళా జట్టుకు దేశవ్యాప్తంగా అభినందనలు వెల్లువెత్తుతున్నాయి. భారత సిగలో మరో కీర్తి కిరీటం వచ్చి చేరిందంటూ హర్షం వ్యక్తం చేస్తున్నారు. ట్విటర్‌ వేదికగా క్రికెట్‌ అభిమానులు తమ సంతోషాన్ని పంచుకుంటున్నారు. 25 బంతుల్లో అర్థ సెంచరీని సాధించిన ఓపెనర్‌ స్మృతి మందానను కొనియాడుతూ నెటిజన్లు పోస్టులు పెడుతున్నారు.  ‘ఎనిమిదిలో మొత్తం ఏడు ట్రోఫీలను గెలిచారు. మిమ్మల్ని చూసి గర్వపడుతున్నాం. శెభాష్‌ అమ్మాయిలు’ అంటూ కామెంట్లు చేస్తున్నారు.  చివరి మ్యాచ్‌లో ఏకపక్షంగా ఆడి అదరగొట్టారని ట్వీట్లు చేస్తున్నారు.