Wriddhiman Saha : మరే ఆటగాడు బెదిరింపులకు గురి కాకూడదు : సాహాకు మద్దతుగా నిలిచిన ఐసీఏ

ఇంటర్నెట్‌ డెస్క్‌ : టీమిండియా సీనియర్‌ వికెట్‌ కీపర్‌ వృద్ధిమాన్‌ సాహాకు ఇండియన్‌ క్రికెటర్స్‌ అసోసియేషన్‌ (ఐసీఏ) మద్దతుగా నిలిచింది. ఇంటర్వ్యూ ఇవ్వనందుకు సాహాను బెదిరిస్తూ ఓ పాత్రికేయుడు చేసిన సందేశాన్ని ఖండించింది. ఈ విషయంపై సమగ్ర దర్యాప్తు చేస్తామని బీసీసీఐ తీసుకున్న నిర్ణయాన్ని ఐసీఏ స్వాగతించింది.

‘ఆటగాళ్ల ఎదుగుదలలో మీడియా కీలక పాత్ర పోషిస్తుందనే వాస్తవాన్ని మేం అంగీకరిస్తున్నాం. కానీ, హద్దు దాటి వ్యవహరించకూడదు. సాహా విషయంలో జరిగింది ఏ మాత్రం ఆమోదయోగ్యం కాదు. సంబంధిత మీడియా యాజమాన్యం ఈ విషయంపై స్పందించి మరోసారి ఇలాంటి ఘటనలు పునరావృతం కాకుండా చూడాలని కోరుతున్నాం’ అని ఐసీఏ అధ్యక్షుడు అశోక్‌ మల్హోత్రా పేర్కొన్నాడు.

‘వృద్దిమాన్‌ సాహాకు మేమంతా మద్దతు తెలుపుతున్నాం. మీడియా నుంచి మరే ఆటగాడు ఇలాంటి బెదిరింపులకు గురి కాకూడదు. ఈ విషయంలో మిగతా మీడియా సంస్థలు కూడా సాహాకు మద్దతుగా నిలవాలి. మరోసారి ఇలాంటి ఘటనలు చోటు చేసుకోకుండా చూడాలి. మీడియా, ఆటగాళ్ల మధ్య జరిగే ఏ సంభాషణ అయినా స్వచ్ఛందంగా ఉండాలి’ అని ఐసీఏ కార్యదర్శి హితేశ్ మజుందార్‌ అన్నారు. ఇంటర్వ్యూ ఇవ్వనందుకు ఓ పాత్రికేయుడు సాహాను బెదిరిస్తూ సందేశం పంపిన విషయం తెలిసిందే. ఈ విషయంపై మాజీ హెడ్‌ కోచ్‌ రవిశాస్త్రి, వీరేంద్ర సెహ్వాగ్, హర్భజన్‌ సింగ్‌ లాంటి పలువురు మాజీ క్రికెటర్లు ఆగ్రహం వ్యక్తం చేశారు.