FIFA: ఫుట్‌బాల్‌ సమాఖ్యపై నిషేధం.. తాష్కెంట్‌లో చిక్కుకుపోయిన 23సభ్యుల మహిళల బృందం

ఇంటర్నెట్‌ డెస్క్‌: భారత ఫుట్‌బాల్‌ సమాఖ్య(ఏఐఎఫ్‌ఎఫ్‌)పై నిషేధం విధిస్తూ అంతర్జాతీయ ఫుట్‌బాల్‌ సమాఖ్య(ఫిఫా) బాంబు వేసిన సంగతి తెలిసిందే. దీంతో భారత ఫుట్‌బాల్‌ క్రీడాకారులు అంతర్జాతీయ వేదికలపై ఆడేందుకు వీల్లేకుండా పోయింది. అయితే ఈ నెల 23న ఉజ్బెకిస్థాన్‌ క్లబ్‌ సొగ్డియానా-డబ్ల్యూతో తలపడేందుకు వెళ్లిన భారత మహిళల లీగ్‌ ఛాంపియన్‌ గోకులం కేరళ జట్టు అక్కడే ఉండిపోయింది. నిషేధం కారణంగా ఈ జట్టు ఆ మ్యాచ్‌లో పాల్గొనే వీల్లేదు. దీంతో తమ పరిస్థితిపై తక్షణ జోక్యం చేసుకోవాలంటూ ప్రధాని మోదీ, క్రీడాశాఖ మంత్రి అనురాగ్‌ ఠాకూర్‌ను ఆ జట్టు సభ్యులు ట్విటర్‌ వేదికగా విజ్ఞప్తి చేస్తున్నారు.

గోకులం కేరళ ఎఫ్‌సికి చెందిన 23 మంది మహిళా జట్టు సభ్యులమంతా ఇప్పుడు తాష్కెంట్‌లో చిక్కుకుపోయామని, తమ భవితవ్యాన్ని తేల్చాలంటూ ట్విటర్‌లో ఓ లేఖ రాశారు. ప్రధాని మోదీ, ట్యాగ్‌ చేశారు. ‘మా జట్టు కోలికోడ్‌ నుంచి ఈనెల 16వ తేదీనే ఉజ్బెకిస్థాన్‌లోని తాష్కెంట్‌కు చేరుకుంది. ఇక్కడికి వచ్చిన తర్వాతే ఏఐఎఫ్‌ఎఫ్‌పై ఫిఫా నిషేధం విధించిన సంగతి తెలిసింది. ఈ నిషేధం కారణంగా ఈ మ్యాచ్‌లో మేం పాల్గొనేందుకు అనుమతి లేకుండా పోయింది. ఈ విషయంలో జోక్యం చేసుకోవాలి. ఫిఫా నిషేధాన్ని ఉపసంహరించుకోవడానికి, ఏఎఫ్‌సీ ఉమెన్స్ క్లబ్ ఛాంపియన్‌షిప్‌లో మమ్మల్ని ఛాంపియన్ క్లబ్ ఆఫ్ ఇండియాగా చేర్చడానికి అన్ని ప్రయత్నాలు చేయాలని ప్రధాని కార్యాలయ్యాన్ని అభ్యర్థిస్తున్నాము’ అని ఆ లేఖలో పేర్కొన్నారు.

అఖిల భారత ఫుట్‌బాల్‌ సమాఖ్యపై నిషేధం విధిస్తున్నట్లు ఫిఫా మంగళవారం ప్రకటించింది. అంతే కాకుండా ఈ ఏడాది అక్టోబర్‌ 11 నుంచి 30 వరకు స్వదేశంలో జరగాల్సిన అండర్‌-17 మహిళల ప్రపంచకప్‌ను ప్రస్తుతానికి భారత్‌లో నిర్వహించడం లేదని వెల్లడించింది. 85 ఏళ్ల చరిత్రలో ఏఐఎఫ్‌ఎఫ్‌పై నిషేధం పడడం ఇదే తొలిసారి. ఏఐఎఫ్‌ఎఫ్‌లో బయట వ్యక్తుల ప్రభావం ఎక్కువగా ఉందనే కారణంతో ఫిఫా ఈ నిర్ణయం తీసుకుంది.

విచారించిన సుప్రీం.. జోక్యం చేసుకోవాలంటూ కేంద్రానికి సూచన

ఈ నిషేధానికి సంబంధించిన అంశాన్ని భారత ఉన్నత న్యాయస్థానం బుధవారం విచారించింది. ఏఐఎఫ్‌ఎఫ్‌పై ఫిఫా విధించిన సస్పెన్షన్‌ను ఎత్తివేసేందుకు కృషి చేయాలని ప్రభుత్వానికి సూచించింది. ఈ సస్పెన్షన్‌పై ప్రభుత్వం ఇప్పటికే ఫిఫాతో చర్చలు జరిపిందని కేంద్రం తరఫున విచారణకు హాజరైన సొలిసిటర్‌ జనరల్‌  తుషార్‌ మెహతా కోర్టుకు తెలిపారు. దీనిపై ధర్మాసనం స్పందిస్తూ.. భారత్‌లో అండర్‌-17 ప్రపంచ కప్‌ను నిర్వహించేందుకు, ఏఐఎఫ్‌ఎఫ్‌పై సస్పెన్షన్‌ను ఎత్తివేసేందుకు కేంద్రం ప్రో యాక్టివ్ పాత్రను పోషించాలని సుప్రీం కోర్టు పేర్కొంది. ప్రపంచకప్ భారత్‌లో జరిగితే అది దేశానికి మేలు చేస్తుందని అభిప్రాయపడింది.